Ambasadoret e treshes KE dhe SHBA i kanë dhënë mbështetje paraditen e djeshme çdo vendimi që do të marrë kreu i shtetit Alfred Moisiu lidhur me zgjedhjet e ardhshme vendore. Të tre zyrtarët ndërkombëtarë, shefi i delegacionit të Komisionit Evropian në Tiranë Helmut Lohan, Ambasadori gjerman si zyrtari i presidencës së radhës së BE Hans Peter Anen dhe zv.ambasadori i SHBA në vendin tonë Stephen Kristina, u takuan paradite me presidentin për të marrë mendimin e këtij të fundit për procesin zgjedhor.
Në faqen zyrtare të Presidencës flitet se tre ambasadorët me kreun e shtetit kanë folur vetëm për procesin e zgjedhjeve të afërta vendore. Por nuk bëhet e ditur asgjë më shumë nga takimi duke e lënë atë një takim publik të mistershëm.
Burime të Gazetës thanë se ndërkombëtarët janë shprehur të shqetësuar për vonesat në realizimin e reformës zgjedhore. Ata, mësohet se i kanë transmetuar Presidentit Moisiu, rekomandimet që janë dhënë së fundmi edhe nga Parlamenti Evropian, në të cilat u tërhiqet vëmendja partive politike. Bashkimi Evropian ka sugjeruar që reforma zgjedhore të përfundojë brenda nëntorit dhe për këtë, mësohet se është diskutuar edhe mes Moisiut dhe ambasadorëve të huaj. Po sipas të njëjtave burime, mësohet se përfaqësuesit ndërkombëtarë janë njohur me vendimin e Presidentit, të cilin ai e ka bërë edhe publik, se do të presë deri në datën 15 nëntor, për një zgjidhjeje konsensuale mes partive politike për datën e zgjedhjeve. Pas kësaj, ai do ta vendosë vetë atë, në respektim të Kushtetutës. Për këtë, Moisiu ka gjetur edhe mbështetjen e ndërkombëtarëve, mbështetje e cila vjen edhe pas sulmeve të maxhorancës kohët e fundit.
Rekomandimet e BE
Në fakt, treshja e ambasadorëve ka zhvilluar këtë takim me kreun e shtetit, dhe as me kryeministrin që është edhe kryetar i maxhorancës, apo me kryetarin e opozitës, duke theksuar në mënyrë indirekte mbështetjen që ata do ti japin vendimeve të kreut të shtetit.
Situata politike mes partive në Shqipëri është ende e acaruar dhe asgjë për sa i përket reformës zgjedhore nuk është zhbllokuar, me gjithë deklaratat e palëve. Parlamenti Evropian sqaroi pak ditë më parë që forcat politike brenda dhe jashtë Parlamentit të kontribuojnë, secila brenda pjesës së vet, në përpunimin e një reforme konsensuale të gjerë dhe të përshtatshme, ndërsa shpreson që me rastin e zgjedhjeve presidenciale të vitit të ardhshëm, situata do të jetë më pozitive. Evropianët sugjeruan që dialogu politik duhet të zhvillohet në një atmosferë më pak konfliktuale. BE sugjeroi që politika shqiptare të ndjekë rekomandimet e OSBE-ODIHR-it për zgjedhjet, por duket se edhe këto kanë hasur në kundërshtinë e palëve. Tashmë mbetet vetëm hapi tjetër i Presidentit, që pasi ka mbledhur dy herë tryezat e partive politike, tashmë të vendosë vetë për datën e zgjedhjeve.