Prokurori Stefano Palaci ka ngarkuar zyrën e hetimeve të hapë një dosje lidhur me çështjen e kallëzuar nga Klarens Sedorf, lidhur me arbitrin Stefano Farina. "Bilbili" gjenovez 44-vjeçar, i cili ka drejtuar derbin e tij të parë Milan Inter me nivel mesatar, të dielën në mbrëmje u akuzua nga mesfushori kuqezi. "Arbitri Farina më ka prekur me duar kur iu afrova për t'i kërkuar shpjegime, - tha Sedorfi në emisionin 'Controcampo diritto di replica'," - duke specifikuar se gjyqtari "ishte nervoz" dhe duke rrëfyer se ngjarja ndodhi në tunel pas përfundimit të pjesës së parë, larg telekamerave. Gazetarët u përpoqën ta pyesnin arbitrin, teksa po nisej për në Barcelonë, por ai nuk u shpreh, pasi e ka të ndaluar të japë deklarata.
Përgjigjja - Të hënën pasdite mbërriti përgënjeshtrimi i prerë i shefit të arbitrave të Serisë A dhe B, Stefano Tedeski: "Farina nuk e ka prekur me duar Sedorfin", - ka bërë të ditur ai përmes një buletini për shtyp. Tedeski, sikurse bën të ditur shoqata italiane e arbitrave, pasi ka lexuar deklaratat e Sedorfit, i ka telefonuar arbitrit ndërkombëtar, i cili ka drejtuar dje sfidën Barcelona Çelsi. "Isha i bindur se ajo për të cilën është akuzuar, nuk është e vërtetë, - ka bërë të ditur përgjegjësi i tij, - megjithatë arbitri më ka konfirmuar se nuk e ka prekur me duar lojtarin." Por lind pyetja se si ka mundësi se edhe në një rast të tillë arbitri nuk mund të flasë?
Klarens Sedorf nuk tërhiqet pas akuzave të bëra ndaj arbitrit të derbit ndaj Interit Stefano Farina. Në fakt, sipas futbollistit të Milanit, Farina ka përdorur duart ndaj tij në fund të ndeshjes: "Është gjithçka e vërtetë dhe për më tepër nuk ishim vetëm, por, - shpjegoi Sedorfi, preferoj të mos shtoj gjë tjetër edhe sepse kanë nisur hetimet." Megjithatë, përgjegjësi i arbitrave, Stefano Tedeski, është shprehur i sigurt se Farina ka mbajtur një qëndrim korrekt, pasi këtë ia ka konfirmuar edhe vetë ai.