KOPENHAGEN - MANÇESTER JUNAJTID (20:45)
- Kopenhageni kërkon golin e parë dhe fitoren e parë në këtë debutim në Ligën e Kampioneve.
- Kopenhageni ka fituar vetëm dy nga nëntë ndeshjet europiane të luajtura në shtëpi dhe nuk ka fituar asnjë nga tri duelet me ekipet angleze.
- Transferta e vetme e Mançesterit kundër një ekipi danez përfundoi me fitoren 6-2 kundër Brondbit në Kupën e Kampioneve 1998-99. Në tri ndeshje kundër ekipeve daneze, Mançesteri ka shënuar 14 gola dhe ka pësuar vetëm dy.
- Junajtidi nuk ka shënuar gol në pesë nga shtatë transfertat e fundit në Ligën e Kampioneve.
Gjyqtar: Volfgang Shtark (Gjermani)



Sër Aleks Ferguson i ka vënë syrin trofeut të Ligës së Kampioneve për të paktën edhe një herë përpara se të mbyllë kapitullin me Mançester Junajtid. Skocezi po u afrohet 20 viteve në krye të titanëve të "Old Traffordit", që i ka ndihmuar të mbushin panteonin e trofeve. Fergusoni e provoi lavdinë europiane më 1999-n, në finalen kundër Bajernit, por klubi nuk ka arritur ta përsërisë këtë sukses në sezonet e fundit. Mançesteri duket se i ka kartat e duhura për t'u kualifikuar për fazën tjetër dhe Fergusoni e ka bërë të qartë se dëshiron të shijojë suksesin në një nga tavolinat më luksoze të futbollit europian. "Prioriteti ynë është që të paraqitemi në mirë në Ligën e Kampioneve dhe kjo nuk do të ndryshojë në këtë klub, sepse Europa është një motivim për ne gjatë gjithë kohës, - tha ai. - Në periudhën time te Junajtidi duhet të kishim bërë më mirë. Në disa vite kemi qenë të pafat, në disa të tjera e lamë të na shpëtonte nga duart, kurse vitet e fundit nuk kemi qenë në lartësinë e duhur. Por me pak fjalë, duhej të kishim fituar të paktën një Kupë Europe më tepër gjatë drejtimit tim në këtë klub dhe shpresoj që një gjë të tillë ta bëjmë para se të largohem".
Mungesat - Mançester Junajtid do të jetë pa Rajan Gigs dhe Luis Sahan në ndeshjen e grupit F kundër Kopenhagenit sot. Në faqen zyrtare të klubit shkruhej se ata që nuk do të udhëtojnë me ekipin për në kryeqytetin danez, janë mesfushori Gigs që pësoi tërheqje, mbrojtësi Nevill me dëmtim në pulpë dhe sulmuesi Saha me probleme në gju. Junajtidi, që ka pikët maksimale pas tri ndeshjeve, duhet të fitojë që të sigurojë vendin për në 1/8. Patrik Evra, që pësoi një dëmtim në kavilje në fitoren 4-0 kundër Boltonit të shtunën, është rikuperuar në kohë për t'u bashkuar me skuadrën.
Nevill - Mbrojtësi i Junajtidit, Geri Nevill, beson se ekipi po korr frytet e lojës konsistente gjatë tetë muajve të fundit. "Djajtë e kuq" humbën vetëm një nga 14 ndeshjet e fundit në sezonin e kaluar dhe e kanë mbajtur këtë formë të mirë edhe në këtë sezon, që për Nevillin kjo është arsyeja pse Mançesteri po fluturon lart si në kampionat, ashtu edhe në Europë. "Tani jemi shumë më tepër konsistentë. Sezonin e kaluar filluam të luanim mirë në muajt e fundit, edhe pse nuk kishte mbetur ndonjë trofe për të luftuar. E kemi vazhduar atë formë edhe në këtë sezon dhe jemi bërë edhe më të fortë. Ka akoma shumë ndeshje për të fituar, përpara se të themi që jemi në garë për titullin kampion. Por tani i kemi dhënë vetes një mundësi shumë të mirë, meqë nuk jemi 12 pikë mbrapa kryesuesve, siç ka ndodhur në fillimin e dy sezoneve të fundit".