Zyrtarja e Departamentit të Shtetit Colleen Graffy vlerësoi në një intervistë ekskluzive për Gazeta Shqiptare se forcat politike në Shqipëri duhet të gjejnë mënyrën për të bashkëpunuar dhe të shtojnë përpjekjet në luftën kundër korrupsionit. Sipas saj, këtij qëllimi i shërben edhe programi i Sfidave të Mijëvjeçarit ku Shqipëria është përfshirë në program. Duke vënë në dukje tre shtyllat kryesore ku mbështetet programi, zonja Graffy bëri të qartë se Shqipëria duhet të plotësojë në kohë këto detyrime, sepse kjo është një nga sfidat kryesore për integrimin në NATO dhe BE.
Programi i Sfidave të Mijëvjeçarit sapo ka filluar për Shqipërinë dhe do të vazhdojë për dy vitet e ardhshme. Pse e aprovuat aplikimin e Shqipërisë për këtë program?
Sikurse jam e sigurt që ju e dini, programi i Sfidës së Mijëvjeçarit, është një program që synon të shpërblejë vendet që qeverisen në mënyrë të drejtë, në vendet ku investohet tek njerëzit dhe në vendet që janë të përgjegjshme. Në vend që të jepet thjesht një ndihmë dhe kaq, kjo është një mënyrë për të ndihmuar këto vende që të arrijnë ndryshimet për të arritur demokratizimin dhe përparimin ekonomik. Ishte vetë Shqipëria që përcaktoi synimet për këtë program, përmes të cilave kërkon të arrijë përparimin ekonomik në të mirë të qytetarëve të saj.
Programi përfshin tre fusha: reformën në administratën e tatimeve, në prokurimin publik dhe regjistrimin e bizneseve. Secili prej këtyre përbërësve, pasi të implementohen do të sjellin një ndryshim të dukshëm në jetën si të popullit shqiptar ashtu edhe të vetë vendit. Përshembull, ideja e “one stop shop” është një mënyrë, nëpërmjet të cilës bizneset mund të investojnë në vendin e tyre me lehtësi përmes një procesi transparent dhe besim në këtë proces. Që të bëjë përparim, Shqipërisë i duhen investime. Atëherë biznesmenët kanë nevojë për përgjegjshmëri, çrrënjosje të korrupsionit dhe një proces të drejtë në mënyrë që këta të fundit, pra bizneset, të duan të investojnë në vendin tuaj.
Në fund fare më konkretisht cilat do të jenë të mirat, përfitimet e Shqipërisë në përfundim të këtij programi dy vjeçar?
Përfitimet e drejtpërdrejta janë që kur bizneset investojnë në vendin tuaj, krijohen vende të reja pune. Taksat do të arrijnë të mblidhen siç duhet, të ardhurat nga tatimet shkojnë për investime përshembull në sektorin e shëndetësisë apo arsimit. Kështu që gjatë gjithë procesi ka investime të drejtpërdrejta që vijnë nga këto investime në vendin tuaj.
Që prej disa muajsh duket se në Shqipëri është stopuar jeta normale politike e parlamentare dhe partitë politike, gjithmonë e më shumë janë duke akuzuar njëra tjetrën për çështjen e korrupsionit. A mendoni se gjithë këto zhvillime në nivelin politik, do të zbehin luftën kundër korrupsionit dhe efektet që do të sjellë edhe ky program i Sfidave të Mijëvjeçarit në luftën kundër tij?
Çrrënjosja e korruopsionit, kërkon jo vetëm punën e qeverisë apo bërjen e ligjeve dhe reformave, por përfshin të gjithë shoqërinë, edhe shoqërinë civile duke kërkuar përpjekjet e të gjithëve. Sigurisht përpjekjet bipartizane nga ana e politikanëve janë shumë të rëndësishme me qëllim që të mund të ecet përpara. Por jo vetëm përpjekjet bipartizane, por përpjekjet e të gjithë shoqërisë.
Demokracia nuk mund të mbijetojë nëse rrënjët e korrupsionit janë më të thella sesa rrënjët e vetë demokracisë. Rrënjët e korrupsionit do të pengojnë rrënjët e demokracisë që të shtrihen dhe të fuqizohen. Korrupsioni pengon besimin e popullsisë dhe të njerëzve në punën e policisë, apo të drejtësisë apo edhe tek vetë qeveria. Eshtë diçka që shkurajon investimet e brendshme apo edhe ato të huaja. Prandaj është me rëndësi absolute që përpjekjet antrikorrupsion të zhvillohen në të gjithë shoqërinë.
Megjithatë, për të qenë më konkretë, në këtë situatë tejet konfliktuale kur parlamenti akoma nuk po zhvillon dot një seancë normale ku partitë parlamentare të diskutojnë për reformat dhe janë duke u zënë gjithmonë e më shumë për kodin zgjedhor, a mendoni se do të arrijë Shqipëria të përmbushë ato objektiva për të cilat ju flisni, apo që konkretisht kërkoni nga vendi ynë?
Ne e dimë që e ardhmja e Shqipërisë varet nga çrrënjosja e korrupsionit. Eshtë një prej hapave drejt anëtarësimit në BE dhe anëtarësimit në NATO dhe të suksesit të Programit të Llotarisë së Mijëvjeçarit. Pra janë shumë gjëra që varen nga këto përpjekje. Prandaj është shumë e nevojshme që përpjekjet të bëhen për ta trajtuar atë në mënyrë urgjente.



Kush është Colleen Graffy
Colleen P. Graffy, zv.asistente sekretare e shtetit për Diplomacinë Publike në Departamentin e Shtetit, ka qëndruar në Shqipëri në një vizitë dyditore gjatë një turi që është duke zhvilluar në vendet e Ballkanit për t’u njohur me vendet që mbulon në Departamentin e Shtetit. Zonja Graffy ka pasur gjatë këtyre dy ditëve të qëndrimit të saj në Shqipëri takime me zyrtarë të lartë të administratës dhe qeverisë, me përfaqësues të shoqërisë civile, medias, kulturës dhe personalitete të tjera për t’u njohur sa më nga afër me realitetin shqiptar dhe çështjet e demokracisë në vendin tonë. E emëruar në Departamentin e Shtetit në shtator të vitit 2005, ajo është e para zv.asistente sekretare për Diplomacinë publike në Departamentin e Shtetit. Në pozicionin e saj, ajo mbulon përpjekjet për diplomacinë publike përreth 55 vende duke bërë kordinimin mes Asistent Sekretararit për Evropën dhe Eurazinë Daniel Fried dhe nën sekretarin për Diplomacinë Publike dhe Çështjeve publike Karen Hughes. Ka njohuri për median sepse gjatë kohës së qendrimit të saj në Britani, gjatë dy dekadave të fundit ka shërbyer edhe si komentuese e përhershme e çështjeve transatlantike për radio dhe televizione të ndryshme.
Informacioni eshte marre nga Gazeta Shqiptare