Fillesa e kësaj historie ka shumë gjasa të jetë tek deponimet e të zbërthyerit si agjent i zbulimit serb, Armando Loshaj, deponime të cilat nuk kanë qenë të administruara zyrtarisht në këtë organ. Shpjegimet e Armandos na janë dorëzuar në formën e një kujtese të shtypur nga ish-inspektori i SHIK-ut Anibal Basha”. Këto paragrafe të shkëputura nga një informacion i klasifikuar “Sekret”, me numër protokolli 2294, i datës 31 korrik 2002, dhe që mban në fund të tij firmën e ish-shefit të SHIK-ut Fatos Klosi, dëshmojnë përse ky i fundit mund të ketë rënë viktimë e agresionit të djeshëm. Ky material sekret i është dërguar Avokatit të Popullit, Ermir Dobjani, i cili kishte kërkuar nga shërbimi inteligjent informacion të detajuar në lidhje me zhdukjen e biznesmenit tetovar Remzi Hoxha. Autoritetet policore dhe hetimore po përpiqen ta nxjerrin të “papërgjegjshëm” agresorin Basha pas ngjarjes së djeshme, por ky material i klasifikuar “Sekret” dëshmon të kundërtën. Nga ky material rezulton se deponimet e agjentit të dyfishtë Armand Loshaj, nuk kanë qenë të administruara zyrtarisht nga SHIK-u i asaj kohe, edhe pse janë cilësuar aq të rëndësishme, sa të niste menjëherë një hetim intensiv që do të përfundonte me fundin tragjik të Remzi Hoxhës. Anibal Basha i ka ruajtur privatisht deponimet e agjentit të shërbimit sekret serb Armando Loshaj, i infiltruar në Shqipëri në vitin 1992, dhe më pas i ka dorëzuar ato në SHIK, diku në fillimin e vitit 1998. Por ai nuk ka pranuar t’i firmosë ato duke i ditur mirë pasojat që mund të kishte në të ardhmen. Ky fakt dëshmon se ish-inspektori i SHIK-ut të Gazidedes nuk ka qenë aq “budalla” sa ç’rezulton tani pasi ka shëmbur në “dru” Fatos Klosin.
“I zbërthyeri”
Nga informacioni që kishte siguruar SHIK-u i Gazidedes rezultonte se Armando Loshaj(identiti i vërtetë i të cilit është Avdyl Loshaj nga Deçani i Kosovës), ishte agjent i shërbimit sekret serb i infiltruar në Shqipëri qysh në vitin 1992. Në materialin që Basha i ka dorëzuar Shërbimit Informativ në fillimvitin 1998, thuhet se Loshaj është “zbërthyer” nga SHIK-u i Gazidedes duke iu vjelë informacioni që ai dispononte si dhe instruktimi që i ishte bërë nga shërbimi sekret serb. Loshaj pasi është përpunuar nga SHIK-u Shqiptar është përdorur për të goditur një celulë të shërbimit sekret serb në Shqipëri, në të cilën pretendohet se bënte pjesë dhe Remzi Hoxha. Në materialin e klasifikuar “Sekret” që ia është dërguar Avokatit të Popullit, thuhet se “Armando Loshaj… është zbërthyer si agjent i shërbimeve sekrete Jugosllave dhe më pas është dërguar me detyra në Maqedoni”. Pikërisht mbi deponimet e të “zbërthyerit” Loshaj, SHIK-u i Gazidedes ka nisur gjuetinë mbi “anëtarët e celulës së UDB-së”, Remzi Hoxha dhe Ziso Kristopulli. Kristopulli ka deklaruar se është pyetur nga SHIK-asit e Gazidedes se:”çfarë udhëzimesh merrje kryesisht nga Ruçi, Meta, Angjeli, Dokle, Agolli…? Cilët janë kryetarët e grupeve të agjenturës sërbe në Sarandë, Vlorë, Shkodër, Durrës, Elbasan etj? Kë keni kryetar? Sa armë e dinamit do të sillje nga Serbia në Shkodër? Ku janë depot në Shkodër? Çfarë strategjie keni për fushatën e zgjedhjeve po humbët? Cilët udhëheqës të partisë keni në lista për vrasje? Po Remziu çfarë detyrash ka? Ku dhe sa herë je takuar me të? Paratë kush jua sillte…?
Inspektori
Nuk dihet pse ish-inspektori i SHIK-ut të Gazidedes, Anibal Basha, ndërroi mëndje për të bashkëpunuar në zbardhjen e rrëmbimit të Remzi Hoxhës. Ai fillimisht ka nisur të bashkëpunojë, madje ka dorëzuar në SHIK dhe deponimet e shtypura të Armand Loshajt. Por pas disa ditësh, më datë 12 mars 1998, kur është thirrur serish që të firmoste mbi dorëshkrimet e dorëzuara prej tij, Basha ka refuzuar në mënyrë kategorike. Madje është shprehur se “po të thirrej nga organet e drejtësisë do të mohonte gjithçka”. Qysh nga ky moment Anibal Basha i ka shkëputur kontaktet me strukturat shtetërore duke mos preferuar më të flasë as për vendodhjen e kufomës së Remzi Hoxhës. Arrestimi i tij ditën e djeshme mund të jetë një shpresë e rilindur për të afërmit e biznesmenit Remzi Hoxha, të cilët pas 11 vjetësh do të kenë sëpaku një varr ku ta qajnë.

Informacione eshte Marre nga Gazeta Shqiptare