Devid Bekham deklaroi dje se dëshiron të qëndrojë te Reali i Madridit, duke hedhur poshtë shkrimet që parashikonin një transferim të ish-kapitenit në Angli ose SHBA. "E ardhmja ime është këtu, edhe jeta ime, - tha Bekhami në një konferencë shtypi. - S'do të kontaktoj me asnjë ekip, sepse në janar s'kam për t'u larguar që këtu". Flitej që Bekhami do të kalonte te Totenhemi, Sëlltiku ose në kampionatin amerikan, ky ku i fundit i ka bërë edhe ofertën më joshëse, sipas shtypit spanjoll. Bekhami tha se bisedimet për zgjatjen e kontratës u ndërprenë, për shkak të ndërrimit të presidentit dhe trajnerit të Reali të Madridit para fillimit të sezonit. "Bisedimet për kontratën kanë vazhduar prapë para dy javësh dhe do të mbajmë një takim tjetër javën e ardhshme", - tha ish-kapiteni i Anglisë. Bekhami mohoi zërat se presidenti i Realit, Ramon Kalderon, ka vënë uljen e rrogës së anglezit si kusht për ripërtëritjen e kontratës. "Këto janë thjesht hipoteza, sepse kjo gjë nuk ka ndodhur. Aq më tepër që për mua nuk është çështje parash. Dua të qëndroj me ekipin, sepse besoj se mund të fitojmë diçka këtë vit", - shtoi Bekhami. Devidi ka luajtur si titullar vetëm në tri nga tetë ndeshjet e Realit në këtë kampionat, por pyetjes nëse dëshiron të largohet nga Reali, ngaqë nuk është titullar nën drejtimin e Fabio Kapelos, ai sqaroi: "Kur të vijë rasti im, duhet ta shfrytëzoj. Po të shkojë mirë, atëherë do të zë vend në ekip. Sigurisht që dua të luaj".