Portieri i Realit të Madridit, Iker Kasiljas, ka deklaruar se rezultatet janë më të rëndësishme në këtë fazë të sezonit sesa spektakli. Reali ka arritur ta kthejë rezultatin pas një pjese të dytë të mrekullueshme dhe ka mundur Gimnastikën me rezultatin 3-1. Skuadra e Fabio Kapelos nuk ka qenë në ditën më të mirë, gjithsesi është përsëri në ndjekje të kryesuesve të Barcelonës. Kasiljasi mendon se loja e skuadrës do të përmirësohet me kalimin e kohës. "Sinqerisht, do të arrijmë të fitojmë me çdo kusht, - tha lojtari i përfaqësueses për "sajtin" zyrtar të "merengesve". - Në fund të sezonit, kur vendoset gjithçka, duhet të fitojmë duke luajtur futboll të bukur. Lojtarët e rinj janë duke u mësuar me skuadrën e re dhe po përshtaten me stilin e Kapelos. Gjithçka do të jetë në rregull nëse do të fitojmë. Ne fituam dhe kjo ka rëndësi". Abel Buades ka kaluar skuadrën pritëse në avantazh me anë të një penalltie, por qendërmbrojtësi Roberto Karlos ka kthyer barazinë përpara përfundimit të pjesës së parë. Ivan Helguera kaloi Realin në avantazh pas fillimit të pjesës së dytë. Vetëm pesë minuta nga fundi, Robinjo ka vulosur rezultatin me anë të një kthese nga fare pranë portës. "Ata na vunë në vështirësi që nga fillimi i takimit, por ne ditëm të përgjigjemi, - shtoi Kasiljasi. - Ne filluam të sulmonim, pasi ata shënuan me anë të penalltisë. Goli i Robertos ishte tepër i rëndësishëm. Ata e luajtën ndeshjen në mënyrën e tyre dhe ne u përgjigjëm në mënyrën tonë. Real Madridi duhet të mësojë si të fitojë në situata të ndryshme që do të gjendet në të ardhmen, duke luajtur futboll të mirë, ashtu si Barcelona". Serxho Ramos ka mbetur shumë i kënaqur që ka parë skuadrën e tij të fitojë edhe një herë tjetër dhe që ka mbetur vetëm me dy pikë diferencë nga vendi i parë. "Ne përfituam nga mundësitë tona, dinim si të fitonim dhe punuam shumë për t'ia arritur kësaj, - tha ish-mbrojtësi i Seviljes. - Kur je duke përjetuar një periudhë të mirë, fillon e mësohesh me fitoren. Shpresojmë të vazhdojmë të fitojmë. Duhet të fillojmë të mos gabojmë më, të fitojmë ndeshje që të kalojmë Barçën dhe më pas të shpallemi kampionë".