Seria A vazhdon të befasojë. Palermo ia ka dalë mbanë në javën e nëntë, ka fituar në Firence, e udhëhequr nga një Amauri i papërmbajtshëm dhe është ngjitur në vendin e parë në renditje bashkë me Interin. Por ka pasur edhe të reja të tjera në javën e nëntë, të të gjitha ngjyrave. Pra nuk ka pasur vetëm rozë dhe të zezë, por edhe bardhezi. Dhe nuk bëhet fjalë për Juven, por për Sienën, e cila ka merituar një vend në kopertinë. Toskanët kanë fituar për herë të parë në historinë e tyre në Askoli dhe tani ndodhen në vendin e katërt, në zonën e Ligës së Kampioneve. Por mbërriti edhe fitorja e parë e Kaljarit. Kuqeblutë e arritën më në fund një sukses, duke mposhtur Sampin pas një ndeshjeje me shumë episode dhe vetëm një gjë konkrete: goditjen e dënimit të Daniele Kontit që tundi rrjetën. Tani vetëm dy skuadra nuk e kanë shijuar ende fitoren: Kievo e Del Nerit që u mund në minutat e fundit nga Mesina e kryegolashënuesit Rigano, dhe Askoli i Teserit, vendi i të cilit është gjithnjë e më në rrezik.
Pas spektaklit të dhuruar nga derbi i Milanos (pa harruar suksesin e rëndësishëm të Romës në Udine), të gjithë sytë ishin përqendruar në Firence, ku luhej ndeshja e madhe midis Fiorentinës dhe Palermos. Sfida nuk ngurroi të falte emocione. Prandeli vazhdon të mos e thyejë tabunë Guidolin (5 ballafaqime dhe po aq humbje), por për këtë duhet të mallkojë vetëm një lojtar, një brazilian. Amauri ka qenë protagonisti absolut i ndeshjes, i cili dha një "asist" të vyer me trinën e jashtme, për golin e Di Mikeles, dhe më pas realizoi një dygolësh të jashtëzakonshëm. Ishin të kota dy barazimet e përkohshme të vjollcëve që erdhën si pasojë e një autogoli të Barzalit dhe një goli të Mutusë. Fiorentina do ta kishte merituar barazimin, por u detyrua të përkulej përbri gjenialitetit të Amaurit.
Ka qenë një ditë fantastike edhe për Sienën. Toskanët arritën të fitojnë në minutat e fundit në "Del Duca", duke arritur të thyejnë një tabu që nuk i kishte parë kurrë të fitonin në Askoli, në 9 ndeshje zyrtare. Meqë ra fjala për tabu, Mesina e Xhiordanos vazhdon të habisë, duke mundur 2 1 Kievon falë një goli të Flokarit në minutat e fundit. Por golashënuesi verdhekuq, Rigano, nuk ka rreshtur së shënuari dhe ka mposhtur për herë të parë në karrierë Siçinjanon, duke qëndruar në krye të renditjes së golashënuesve, me 7 gola, dhe duke i ngjitur siçilianët në zonën e plotë UEFA.
Në takimet e tjera vazhdon të mos shkëlqejë Torino. Zakeroni, në fushën asnjanëse të Barit, u shpëtua në minutat e fundit nga barazimi i Françeskinit, në sfidën mes matrikullash ndaj Katanias. Ka arritur të mbushet me oksigjen Parma që ka thyer Atalantën. Një barazim i varfër 0-0 mes Lacios dhe Rexhinës.