Shqipëria nuk ka krijuar ende një mjedis biznesi tërheqës për investitorët e huaj. Pavarësisht nismës së fundit të qeverisë “Shqipëria një euro” për thithjen e investitorëve të huaj, në rezolutën për Shqipërinë Parlamenti Europian thekson ndër të tjera se ekonomia informale shqiptare mbetet një fenomen i dukshëm. “Ekonomia informale shqiptare mbetet një konkurrues i pandershëm i tregut dhe se mjedisi i biznesit nuk është edhe aq atraktiv për investitorët e huaj”, thuhet në një nga pikat e rezolutës së Parlamentit Europian. Sipas tyre, konkurenca e pandershme e tregut vazhdon të jetë një problem jo i vogël që ende mban “larg”, investitorët e huaj në Shqipëri. Sipas statistikave ekonomia informale ishte pothuajse në 30% të tregut, por shifrat kanë ardhur në ulje. Të përfshirë nga çështjet politike, anëtarët e delegacionit shqiptar në Parlamentin Europian thuajse nuk e prekën fare këtë vërejtje të eurodeputetëve edhe pse ka të bëjë me investimet e huaja në vend. Ndër të tjera, në rezolutën e Parlamentit Europian theksohet se është e nevojshme që dialogu politik të zhvillohet në një atmosferë më pak konfliktuale dhe institucionet shqiptare të ndjekin rekomandimet e OSBE/ODIHR-it të nxjerra pas zgjedhjeve parlamentare të 2005-ës. PE dënon përkeqësimin e ndjeshëm dhe të mëtejshëm të marrëdhënieve mes Partisë Demokratike dhe Partisë Socialiste, gjatë verës 2006 në lidhje me debatet për reformën zgjedhore dhe thekson se një marrëveshje e arritur nga ndërkombëtarët, apo n jë kompromis nuk është zëvendësimi i duhur për debatin civil brenda partive parlamentare për reformat që i duhen Shqipërisë. Në rezolutë theksohet gjithashtu se Shqipëria ka nevojë për një përmirësim të sistemit të saj të drejtësisë, për ta bërë sa më të pavarur dhe mirëpret politikën e “tolerancës zero” të shpallur nga qeveria për korrupsionin.

Informacioni eshte marre nga Gazeta Shqiptare