Rreth 200 copë janë gjetur në koshat e rrugës “Bardhyl”

Mbi 200 fatura të Albtelekomit përfundojnë në kazanin e plehrave pa mbërritur në duart e qytetarëve.

Pjesa më e madhe e faturave i përket rrugës “Kongresi i Lushnjës”, që ndodhet pranë Prefekturës te “21 Dhjetori”. Faturat mbajnë vulën e postës dhe janë të pahapura. Banorët e kësaj zone, të cilët i morëm në telefon, na thanë se ato asnjëherë nuk kanë marrë fatura të Telekomit.

Paradoks
Duke ecur përgjatë rrugës “4 Dëshmorët” gati në të dalë te rruga “Bardhyl”, instinktivisht syrin na e tërhoqi një grup i madh zarfesh. Ulim sytë dhe shohim se faturat i përkisnin Albtelekomit. Në fillim menduam se ndonjë fëmijë i prapë ka marrë faturat nga shkalla e pallatit dhe i ka hedhur, por nuk mund të ishte kështu kur numri i tyre ishte mbi 200. Ulëm vështrimin sërish dhe tërhoqëm nga tufa e madhe, një dorë me zarfesh. Ato ishin të pahapur dhe mbanin edhe vulën e postës mbi të cilën lexohej data 4.10.2006, gjë që na hoqi dhe dyshimin që faturat nuk ishin të hershme. Faturat e Albtelekomit i përkisnin në pjesën më të madhe rrugës “Kongresi i Lushnjës”, i cili ndodhet pranë 21 dhjetorit dhe s’ka lidhje me rrugën “Bardhyl”. Faturat që duhet të mbërrinin në duart e qytetarëve i përkasin muajit shtator. Familja e Koko**** duhet të paguajë 2400 lekë në total për muajin shtator, por ata nuk kanë nga ta dinë. Meqë mbi fatura janë edhe numrat e telefonave, provuam të lidheshim me këto familje. I pyesim nëse ata i kanë marrë faturat e telefonit, por zëri i një gruaje nga ana tjetër përgjigjet që jo vetëm nuk kanë marrë shtatorin, por kanë muaj që nuk shohin zarfet e Telekomit në shtëpitë e tyre. “Ne, moj të keqen, nuk mund të planifikojmë paratë që na duhen për të paguar faturat në fund të muajit. Të mos ju duket çudi se ne jemi familjarë e i bëjmë këto llogari. Por si njerëz të civilizuar që jemi shkojmë gjithmonë vetë tek arka 6 dhe paguajmë paratë, sa të na thonë ato. Jemi ankuar te punonjëset dhe i kemi thënë që s’na vijnë, por s’ka asnjë ndryshim”, thotë e zonja e shtëpisë. Përgjigje të njëjtë marrim tek të gjithë numrat që provuam. Mes Telekomit dhe qytetarit ekziston një kontratë, ku qytetari detyrohet që deri në fund të muajit të paguajë faturën dhe në të kundërt nis kamatëvonesa. “Sipas tyre ne të gjobitemi po Telekomi a ka faj që s’na sjell faturat, apo jo... Aman punët tona dihen”, thonë qytetarët e zhgënjyer dhe të çuditur nga fakti që faturat e tyre përfundojnë në kosh të plehrave.

• Kujtesa
  Në fund të çdo fature shkruhet; “Kujdes”! Afati për likuidimin e faturës është deri në fund të muajit. Çdo vonesë mbas këtij afati shoqërohet me aplikim kamatëvonesë dhe ndërprerje sinjali, sipas kontratës së pajtimit...
  
• Detyrimi
  Detyrimin e qytetarit e dimë, po Albtelekomi a ka detyrim në bazë të kontratës së ndërsjellë. Një justifikim është se ata kanë bërë kontratë me Postën, por edhe në këtë rast duhet të interesohen.

Informacione jan marre nga Gazeta Panorama