Pa u shuar mirë polemikat lidhur me ferexhenë e studentes Behie Hoxha, një tjetër skandal me ngjyrim fetar është konstatuar në auditorët e universitetit “Aleksandër Moisiu”.

Studentit të degës së Administrim-Biznesit, Julian Mebelli, i është lënë nga rektorati një afat dyjavor për të rruar mjekrën e tij të gjatë. Burimet universitare citohen të kenë deklaruar për “Panorama”-n, se 19-vjeçari nga Lushnja është thirrur nga rektori Agim Kukeli në zyrën e tij, ku i është komunikuar edhe urdhri për të reflektuar në segmentin kohor të 15 ditëve lidhur me mjekrën e tij. Gjatë qëndrimit në zyrë, në prani edhe të anëtarëve të bordit drejtues të Universitetit, djaloshi jo vetëm që është pyetur për mjekrën, por edhe mënyrën e jetesës të tij. Në përfundim të bisedës verdikti i rektorit Kukeli, ka qenë sërish afati dyjavor. “Brenda dy javëve ti duhet të rruash mjekrën. Nëse nuk e bën një veprim të tillë brenda dy javëve, atëherë duhet të braktisësh studimet”, i ka deklaruar Kukeli të riut nga Lushnja. Por studenti besimtar nuk e ka pritur mirë një gjë të tillë. Ai është ndjerë i fyer, që dikush i kërkon të heqë dorë nga mënyra e tij e të besuarit, në emër të ruajtjes së laicitetit të shkollës.
Vetëm një javë më parë, rektori Kukeli hapi një prej debateve më delikate në lidhje me mbajtjen e simboleve fetare në shkollë. Ai kërcënoi me përjashtim një studente nga Durrësi, e cila vinte në shkollë e mbuluar, e veshur sipas traditës myslimane. Debate e polemika të shumta kanë shpërthyer gjatë kësaj jave në lidhje me veprimin e rektorit Kukeli, i cili nuk është i mbështetur në asnjë ligj.
Përsëritja e ngjarjes ka sjellë reaksion edhe te studentët, të cilët tashmë e kanë shndërruar në një argument fiks të bisedave të tyre konfliktin mes rektoratit dhe besimtarëve myslimanë. Burime studentore shprehen se Julian Mebelli i ka bërë me dije si bashkëmoshatarëve të tij, ashtu edhe rektorit, se edhe Naim Frashëri, apo Fan Noli kanë pasur mjekër të gjatë. “Madje edhe ateisti më i madh i të gjitha kohërave, Karl Marks, gjatë të gjithë jetës së tij ka mbajtur mjekër të dendur”, mësohet se i ka deklaruar rektorit adoleshenti nga Lushnja.

Reagon rektori Agim Kukeli pas akuzave për anti-islamik
“Jam ateist, por nëna ime ka mbajtur ramazan për 30 ditë”

DURRES - I gjendur përballë akuzave si “antimysliman”, pasi ka shënuar aktin e dytë ndaj besimtarëve të kësaj feje, rektori Agim Kukeli shprehet për gazetën se nuk ka asgjë me besimin islam. Ai vazhdon të mbështesë idenë e tij se ka dalë në mbrojtje të laicitetit të universitetit “Aleksandër Moisiu”, i cili është ngritur mbi parimin e autonomisë. “Unë jam ateist dhe institucioni që drejtoj është laik. Kam respektin maksimal për myslimanët, pasi edhe mamaja ime është një e tillë. Ajo ka agjëruar gjatë gjithë muajit të Ramazanit, por kjo nuk do të thotë që unë të shkel mbi Kodin e Etikës universitare, duke lënë studentë me pamje aspak laike të shkelin në auditore. E ritheksoj, nuk lejoj mjekrat, ferexhetë dhe as studentët me veladon”, është shprehur Kukeli gjatë një prononcimi të tij për gazetën “Panorama”. Megjithatë, një vendim i tillë, si në rastin e parë ashtu dhe në rastin e dytë, nuk është pritur mirë nga studentët. Një pjesë e mirë e tyre e kanë kundërshtuar aktin përjashtues, ndërkohë që një pjesë tjetër, ka qëndruar indiferente ndaj vendimit të rektorit.
Sipas vetë Kukelit, iniciativa për të përjashtuar studentët nuk ka qenë personale. Ajo ka ardhur pas konsultimit me bordin drejtues të Universitetit, të cilët kanë rënë dakord me propozimin e rektorit. Por megjithëse rektori Kukeli është shprehur i bindur dhe këmbëngulës në vendimet e tij, madje duke i ndërmarrë njëri pas tjetrit, në asnjë vend të rregullores së shkollës nuk është e caktuar sesa duhet të jetë mjekra e studentit. Tashmë të hënën studentja Behija Hoxha duhet të marrë një prej vendimeve më të rëndësishme të jetës të saj: të vazhdojë të jetë një besimtare e devotshme e të lërë shkollën, apo të vazhdojë shkollën duke hedhur mënjanë besimin. Para një dileme të tillë, rektori ka vendosur edhe studentin Mebelli nga Lushnja.

Shezai Rrokaj
“Nuk ka rregull për mjekrën”

“Në asnjë dokument të universiteteve, në asnjë rregullore apo status, nuk është parashkruar që të përjashtohen studentë për shkak të ferexheve apo mjekrës. Mendoj që ka ardhur koha që Ministria e Arsimit, apo edhe Konferenca e Rektorëve t’i kërkojë Gjykatës Kushtetuese një interpretim kushtetues, sepse në të kundërt ne do të endemi mes të drejtës dhe të padrejtës, midis moralit dhe disiplinës institucionale. Në të tilla kushte, do të duhet që këtë problem ta zgjidhin institucionet gjyqësore. Gjykata Kushtetuese duhet të shprehet nëse cenohet laiciteti i shkollës së lartë nga kjo sjellje, apo shkolla të tilla si Medreseja dhe shkollat fetare a e cenojnë laicitetin. Ka ardhur koha që është universitetet të kenë ndoshta një kod etike akademik, por unë mendoj se çështje të tilla duhet t’i zgjidhin sociologët, historianët, psikologët, sepse janë çështje të shoqërisë shqiptare në tranzicion, duke pasur parasysh se flitet për një moshë mbi 18 vjeç”, thotë rektori i UT-së.

Hoxha: Debim i panevojshëm

Për rektorin e Universitetit Politeknik Përparim Hoxha, dëbimi i studentit të Universitetit të Durërsit, për shkak të mjekrës së tij, nuk ishte i nevojshëm. Ashtu siç është shprehur edhe herë të tjera, rektori Hoxha, këto çështje mund të zgjidhen me vendime administrative. “Unë jam shprehur edhe më parë se duhet një vendim administrativ për të rregulluar këtë çështje. Në shkollat publike duhet të funksionojë etika personale e secilit. Ky është kufiri minimal. Ka një nen në statutin e shkollës së lartë, sipas të cilit duhet respektohet etika e sjelljes. Ndërsa në kuadër të diskutimit të draftit për projektligjin e arsimit të lartë është përfshirë edhe diskutimi për kodin e etikës në universitete. Unë mendoj se është komisioni i senatit ai që duhet të vendosë në të tilla raste, jo vetëm për paraqiten nga ana fetare të studentëve, por në të gjitha aspektet e tjera”, thotë rektori i Universitetit
Politeknik të Tiranës, Përparim Hoxha.

Informacioni eshte marre nga Gazeta Panorama