Roma synon titullin? Absolutisht po për Françesko Totin. Por Luçiano Spaleti ka disa rezerva dhe e sqaron këndvështrimin e tij. "Mund t'i krijojmë vështirësi çdo skuadre. Besojmë se këtë vit mund të bëjmë diçka të mirë. Toti është nga ata që për të folur kështu, duhet më parë të përmirësohet, siç duhet ta bëjnë të gjithë, duke filluar nga unë. Nëse Françesko mendon kështu, atëherë duhet të japë më tepër". Duke filluar nga sfida e sotme kundër Askolit, ndeshje që Spaleti fton lojtarët të mos e nënvlerësojnë, pavarësisht krizës së rezultateve për skuadrën bardhezi. "Askoli ka ndryshuar shumë krahasuar me vitin e kaluar, - shpjegon trajneri verdhekuq. - Kam shumë respekt për skuadrën e Teserit dhe uroj të kenë edhe ata për lojtarët e mi".
Spaleti nuk dëshiron më hapa të gabuar dhe shton: "E njoh mirë Teserin. Eshtë një trajner i përgatitur që di t'i japë një fytyrë shumë të saktë skuadrave që stërvit. Askoli u kompletua disi me vonesë dhe prandaj hasi në vështirësi, kishte probleme të vogla në formimin e grupit. Në aspektin psikologjik, mendoj se skuadra nuk ka pësuar goditje nga barazimi të dielën. E mbyllëm ndeshjen në rritje dhe ishin episodet që vendosën. Sigurisht që një pikë në dy ndeshje është pak. Mund të merrnim më tepër".
Edhe për sfidën me Askolin, Roma nuk do të grumbullohet para ndeshjes në klub. "Eshtë një vendim që e kam marrë unë. Klubi nuk është dakord, por duke parë që përkushtimi i djemve të dielën ishte maksimal, unë nuk ndërroj mendje. Këto gjëra më pëlqen t'i vendos unë. Klubi më ka lënë "carta bianca", sepse unë jam në kontakt me dhomat e zhveshjes dhe di hollësi që ata ndoshta nuk i dinë".
Spaleti nuk beson se Milani është jashtë luftës për titull. "Duhet t'i lëmë të qetë. Janë vetëm 11 pikë larg vendit të parë dhe janë akoma shumë ndeshje për t'u luajtur". Spaleti është i bindur që Palermo mund të luftojë deri në fund për titullin kampion. "Mendoj se po, por mos e nënvlerësoni edhe Udinezen". Ky është një kampionat që i pëlqen trajnerit të Romës. "Eshtë më i ekuilibruar. Skuadrat stërviten mirë, sulmuesit shënojnë më pak, sepse po konsolidohen repartet mbrojtëse". Edhe ai do t'ia jepte çmimin prestigjioz europian, "Topin e artë", një lojtari italian. "Pa dyshim Xhanluixhi Bufonit. Ka bërë pritje të jashtëzakonshme. E ka demonstruar me kohë që është profesionist i madh në rolin e tij. Po paraqitet shumë mirë edhe në Serinë B. Nuk e përçmoi kategorinë inferiore dhe si rrallë ndonjë portier, ka një vazhdimësi për t'u admiruar. Për më shumë, e vlerësoj edhe për zgjedhjen e bërë pas vendimeve të skandalit: për një kampion bote do të ishte e vështirë të qëndronte një kategori më poshtë dy muaj pas triumfit botëror, por për Bufonin s'paska qenë. Vërtet një kampion."
Informacione eshte marre nga gazeta sporti shqiptar