Drejtoria .e Higjienës së kryeqytetit ka firmosur gjatë javës së kaluar një vendim mbylljeje për një tjetër shkollë. Kësaj radhe bëhet fjalë për shkollën dhe kopështin e Laknasit, në bashkinë e Kamzës, e cila sipas inspektorëve, ka probleme me ujin e pijshëm. Specialistët pohojnë se shkolla do të hapet vetëm pasi të jetë zgjidhur çështja e ujit të pijshëm që rrjedh në çezmat e kësaj shkolle, ndërsa mësohet se inspektorët e higjienës thonë se i friken një epidemie të hepatitit A nga uji i pijshëm, ndaj kanë deklaruar se do të mbyllin të gjitha ata shkolla që nuk kanë furnizim normal me ujë të rrjedhshëm.
Vendimi
Gjatë një kontrolli të ushtruar nga inspektorët e Higjienës së kryeqytetit në shkollën e Laknasit, ka rezultuar se ajo ka probleme serioze higjieno-sanitare. Sipas drejtorit të Drejtorisë së Higjienës, Manush Thanasi, një javë më parë ata janë detyruar që të firmosin një vendim mbylljeje për këtë shkollë dhe kopshtin e Laknasit për arsye se kanë konstatuar probleme me ujin e pijshëm. Thanasi pohon se për këtë ka vënë në dijeni edhe bashkinë e Kamzës dhe Drejtorinë Arsimore për të sistemuar diku tjetër 1200 nxënësit e kësaj shkolle. Sipas tij, nxënësit duhet të rikthehen sërish në ambjentet e kësaj shkolle, vetëm pasi të jetë zgjidhur problemi me ujin e pijshëm. Vetëm pak ditë pas nisjes së këtij viti shkollor, drejtoria e Higjienës firmosi një tjetër vendim mbylljeje për shkollën "Abdulla Keta", për shkak të shpërthimi të ujërave të zeza. Nxënësit iu rikthyen mësimit në ambjentet e tyre vetëm pasi u rregulluan kanalizimet e ujërave të zeza, të cilat përmbytnin shkollën sa herë që binte shi.
Kontrollet
Pas epidemisë me origjinë hidrike të hepatit A gjatë sezonit të verës, specialistët e Higjienës po kontrollojnë cilësinë e ujit të pijshëm në të gjitha institucionet arsimore. Sipas drejtorit të Higjienës, Manush Thanasi do të mbyllen të gjitha objektet që kanë probleme me ujin e pijshëm. "Nëse ne konstatojmë probleme me ujin e pijshëm ose mangësi në furzimin e shkollave dhe kopshteve me të, atëherë ata duhet të mbyllen më parë se të kthehet në një burim infeksioni". Sipas drejtuesve të Higjienës ata po monitorojnë situatën në shkolla, pasi aty ka grumbullime kolektive dhe mundësia e përhapjes së sëmundjeve është shumë e madhe. "Një epidemi nëpër shkolla do të ishte shkatërruese", pohojnë specialistët.

Informacione eshte marre nga gazeta shqiptare