Tatimet dhe doganat i kanë shkaktuar miliona lekë dëme buxhetit të shtetit. Kontrolli i Lartë i Shtetit ka publikuar dje raportin për kontrollin e ushtruar në degën e Tatim-Taksave në Fier si edhe në degën e Doganës në Kakavijë. Edvin Morava, zëdhënës i KLSH-së, tha dje se dëmi i shkaktuar nga dega e Tatim-Taksave në Fier arrin në 1.6 miliardë lekë, ndërsa në doganën e Kakavijës dëmi arrin në 113 milionë lekë. Për këto dëme KLSH-ja ka bërë kallëzim penal për katër kryedoganierë të Kakavijës. Dëmet janë shkaktuar gjatë vitit 2004-2005.
Tatimet
Në degën e Tatim-Taksave në Fier, dëmi ekonomik që i është shkaktuar buxhetit të shtetit arrin në 1.6 miliardë lekë. Sipas raportit të KLSH-së, ky dëm është shkaktuar nga moszbatimi i ligjit për TVSH-në. Nga kjo shkelje janë evidentuar 773 milionë lekë dëme. Konkretisht për ****je të kryera nga subjekte të biznesit të madh me emërtimin “Klient”, pra për ****je të paidentifikuara. Dëmi i shkaktuar është 509 milionë lekë. Për detyrime për TVSH-në e gjoba të pallogaritura, dëmi i shkaktuar është 237 milionë lekë. Shkeljet e degës së Tatim-Taksave në Fier nuk mbarojnë me kaq. Sipas raportit të KLSH-së, si pasojë e moszbatimit të ligjit për Tatimin mbi të Ardhurat, dëmi i shkaktuar për tatim-fitim e gjoba, arrin në 507 milionë lekë. Ndërkaq, si rezultat i moszbatimit të ligjit për procedurat tatimore në kryerjen e transaksioneve CASH, është shkaktuar një dëm prej 294 milionë lekë. Për këto shkelje KLSH-ja ka rekomanduar 21 masa administrative për punonjësit e kësaj dege.
Doganat
Buxhetit të shtetit i janë shkaktuar dëme të konsiderueshme edhe nga shkeljet në dogana. Sipas raportit të KLSH-së, në degën doganore të Kakavijës nuk është zbatuar “Kodi Doganor”, veprim i cili i ka shkaktuar buxhetit të shtetit një dëm prej 113 milionë lekësh. Në këtë degë nuk është llogaritur vlera reale e mallrave, çka ka shkaktuar një dëm prej 111 milionë lekë. Rreth 2 milionë lekë është i shkaktuar nga detyrimet doganore të papaguara në autorizimet e mbyllura të regjimit të përpunimit aktiv. Ndërkaq, për gjobat e pallogaritura të rezultuara si diferencë e çmimit të faturës me atë të verifikuar në origjinale, dëmi i shkaktuar arrin në 0.5 milionë lekë. Për dëmet e shkaktuara KLSH-ja ka bërë kallëzim penal për 4 ish-kryetarë të kësaj dege dhe ka rekomanduar 27 largime nga puna.
Zyrat vendore
Në zyrat vendore të regjistrimit të pasurive të paluajtshme (ZVRPP) në Lezhë, janë konstatuar shkelje në regjistrimin e objekteve me leje ndërtimi dhe trojeve të ****ura nga Komunat dhe Bashkia, në kundërshtim me ligjin e urbanistikës. Janë konstatuar shkelje në regjistrimin e apartamenteve të privatizuara nga Bashkia dhe subjektet e tjera të kaluara nëpërmjet Entit Kombëtar të Banesave. Sipas raportit të KLSH-së, janë konstatuar shkelje edhe në regjistrimin e 22.260 metër/katror truall në kundërshtim me ligjin “Për rezervat ujore”. Ndërsa në ZVRRPP, në Korçë, në 34 raste me sipërfaqe 90.154 metër/katror janë kryer transaksione dhe janë bërë regjistrime fillestare, duke shkelur legjislacionin përkatës. Në 17 raste janë bërë regjistrime në sipërfaqe prej 3030 metër/katror më tepër se në kartelat e pasurive të paluajtshme. Ndërkaq, në një rast është regjistruar një sipërfaqe prej 3000 metër/katror, truall publik i ****ur nga këshilli i qarkut Korçë, brenda vijës kufizuese të qytetit.



KLSH, kallëzim penal për:

4 ish-kryedoganierë të Kakavijës
Jorgo Faro, shef i hartografisë Korçë
Artur Brahimllari, shef i zyrës juridike Korçë
Robert Shore, ish-kryeregjistrues në Korçë
Përparim Llamllarinë, ish- kryeregjitrues i Lezhës
Pjetër Miloti, shef i zyrës juridike në Lezhë

Masa te tjera
27 largime nga shërbimi civil për punonjësit e Doganës
21 masa administrative për punonjësit e Tatim-Taksave në Fier