PS-ja ka depozituar dje në Prokurorinë e Përgjithshme, padinë për ministrin e Brendshëm, Sokol Olldashi. Zëdhënësi i PS-së, Saimir Tahiri, i cili dorëzoi edhe padinë e firmosur nga sekretari i përgjithshëm, Pandeli Majko tha se PS-ja e akuzon ministrin për shpërdorim detyre. Sipas padisë, “Ministri i Brendshëm, duke lejuar shpërndarjen e certifikatave në mungesë të plotë të elementëve të sigurisë së tyre, ka konsumuar elementët e veprës penale të shpërdorimit të detyrës, vepër kjo e parashikuar nga neni 248 i Kodit Penal”. Këto veprime, thuhet në padinë e dorëzuar dje në Prokurori, kanë cenuar dhe dëmtuar në mënyrë të qenësishme interesin shtetëror. Sipas zëdhënësit të PS-së, janë mbi 1 milionë certifikata të cilat janë jo vetëm të parregullta, por edhe lehtësisht të falsifikueshme dhe ministri Olldashi sipas PS-së, nuk respektoi vendimin e ekspertëve, por urdhëroi në mënyrë të paligjshme shpërndarjen e tyre. “Kjo e kthen z. Olldashi në shpërdorues të rrezikshëm të detyrës dhe besimit publik, fakt ky që potencialisht mund të sjellë pasoja të rënda”, - tha dje zëdhënësi Tahiri. Sipas tij, “Olldashi tanimë nuk është i vetmi person për të cilin PS-ja ka depozituar kallëzim penal. Z. Berisha, Z. Nishani, Z. Basha, Z. Pone dhe disa zyrtarë të tjerë, u bë kohë që shpërfillin detyrimin e tyre ligjor për të dhënë llogari në Prokurorinë e Përgjithshme”.
Procedurat
Në padinë e tyre, socialistët sqarojnë se në gusht të këtij viti, Ministria e Brendshme ka lidhur kontratë me fituesin e tenderit subjektin “ILAR” sh.p.k, për prodhimin e certifikatave të Gjendjes Civile. Pas gjithë procedurave të fazës së parë, është ngritur edhe komisioni i kolaudimit për pritjen dhe kolaudimin të certifikatave të gjendjes civile të prodhuara nga subjekti “ILAR” sh.p.k., i cili konstatoi se përveç mangësive në dokumentacionin shoqërues të mallit, ekzistonin edhe mangësi të ndryshme të cilat preknin cilësinë dhe sigurinë e elementëve të sigurisë së certifikatave, elementë këto të cilat ishin kërkuar nga enti prokurues me dokumentet e tenderit, si dhe ne kontratën e nënshkruar mes palëve. Është vërejtur se certifikatat kanë tonalitet të ndryshëm ngjyrash nga specimeni i kërkuar, ka mungesë të hologramës në certifikata, ka prerje jo të saktë të hologramës, ka certifikata të dubluara me të njëjtin numër kodi dhe të njëjtin numër serie. Për të gjitha mangësitë e vërejtura është njoftuar ministria, ndërkohë që Komisioni i Kolaudimit, pasi bëri këto konstatime, vendosi që mallin ta quajë mall në ruajtje, pa e bërë hyrje në magazinë. Sipas padisë së socialistëve, me gjithë shkeljet e vërejtura, certifikatat janë shpërndarë. PS-ja i ka bashkëngjitur padisë edhe prova të tilla si; specifikimet teknike të certifikatave të gjendjes civile; procesverbalin nr. 8 dhe procesverbalin nr. 17 të Komisionit të Kolaudimit, ku konfirmohet se malli i ardhur nuk është sipas specifikimeve teknike; fotokopje e specimenit të kërkuar, fletë-dalje nga magazina e QFMT-së për një sasi malli, etj.

Informacion i marre nga gazeta shqiptare