GREQI. Rojat bregdetare kanë ndaluar 58 klandestinë në detin Egje dhe kanë arrestuar dy të dyshuarit si trafikantë, që të dy nga Turqia. Një anije me flamur turk me 35 emigrantë në bord u ndalua në afërsi të ishullit Agathonissi. Dy anëtarët turq të ekuipazhit u arrestuan. Nuk ka të dhëna për kombësinë e klandestinëve. Dy klandestinë të tjerë, një shqiptar dhe një palestinez, u arrestuan kur përpiqeshin të hipnin në një traget që shkonte në Itali, me pasaporta false.

TIRANE. Presidenti i dërgoi një mesazh urimi Presidentit të Republikës së Hungarisë, Lazlo Solyom, me rastin e 50-vjetorit të Revolucionit Hungarez për Liri. Përmes këtij mesazhi Moisiu shprehet se “kjo ngjarje e shënuar në historinë e popullit Tuaj, dëshmoi haptazi se aspiratat për liri e demokraci ishin ideale të rrënjosura në shpirtin e hungarezeve.

BERLIN. Një punëtor ndërtimi vdiq dhe pesë persona të tjerë u plagosën sot, kur një makineri preku në një mjet plasës gjatë punimeve në një rrugë në jug të Gjermanisë. Policia deklaroi se nuk ishte ende e sigurtë, por shtoi se incidenti mund të kishte ndodhur nga shpërthimi i një bombe të pashpërthyer të Luftës II Botërore.

KROACI. Një gjykatë urdhëroi arrestimin e një deputetit të rëndësishëm i dyshuar për krime kundër civilëve serbë gjatë luftës për pavarësi të Kroacisë në vitet 1991-95. Gjykata urdhëroi arrestimin e Branimir Glavas, i cili ndodhet nën hetim për rrëmbim, torturim dhe vrasje të serbëve në qytetin lindor të Osijekut në fund të 1991 kur ai ishte i ngarkuar me detyrën e mbrojtjes së qytetit.

TIRANE. “Kufoma e gjetur në Zall Herr dyshohet se i përket një shtetaseje të huaj”, bënë të ditur sot nga Policia e Tiranës. Sipas burimit të cituar, “ky version është ngritur paraprakisht nga Policia e Tiranës, pas verifikimeve të bëra në lidhje me shenjat që janë gjetur në trupin e vajzës së masakruar si edhe mbi informacionet e shqyrtuara deri më tani për vajzat e larguara në Tiranë dhe rrethe”.

RIAD. Një klerik i lartë saudit deklaroi sot se komentet kontradiktore të papa Benediktit XVI për Islamin ishin një shprehje e zemërimit dhe frikës ndaj përhapjes së gjerë të fesë myslimane. Shumë liderë myslimanë kanë kritikuar ashpër komentet e Atit të Shenjtë në një fjalim në muajin shtator, ku citoi një perandor bizantin të shekullit XIV i cili kishte deklaruar se feja islame ishte e "dëmshme, e paarsyeshme dhe se ishte përhapur me tehun e shpatës". "Këto komente bëhen për shkak të zemërimit në zemrat e kundërshtarëve lidhur me përhapjen e Islamit përtej të gjithë kufijve dhe pengesave", deklaroi Sheikh Saleh bin Humaid në një predikim në Xhaminë e Madhe të Mekës me rastin e festës së Bajramit të Madh.

TIRANE. "Qeveria është e vendosur për të pasur një reformë sociale të sigurtë dhe një ndarje të drejtë të fondeve të tyre", u shpreh Kryeministri Sali Berisha, sot gjatë një prononcimi për shtyp, pas vizitës së tij në Komunitetin Mysliman Shqiptar, me rastin e festës së Bajramit. Kreu i Qeverisë tha, se "kjo është një ditë e angazhimit të madh, për një shpërndarje më të drejtë, më të ndershme të pasurive kombëtare, është një ditë thirrje që suksesi dhe arritja të mos na pengojnë të shohim dhimbjen, vuajtjen, hallin, dertet e pafundme të qytetarëve në nevojë".

KORÇË. Besimtarët myslimanë të qytetit të Korçës kanë kremtuar sot festën e tyre më të rëndësishme fetare të Bajramit të Madh me një sërë ceremonish të kultit të tyre, të organizuara si në xhaminë e vjetër të qytetit, edhe në ambiente të tjera familjare dhe shoqërore. Dhjetëra e dhjetëra besimtarë myslimanë kanë marrë pjesë në faljen e mëngjesit në xhaminë e vjetër " Iljaz bej Mirahori", tashmë e rikonstruktuar për organizimin më të mirë të ceremonive fetare.

KABUL. Lideri taleban në arrati, Mullah Mohammad Omar ka shfrytëzuar festën e shenjtë myslimane të Bajramit të Madh për të paralajmëruar se luftëtarët nën komandën e tij do të intensifikonin veprimet e tyre luftarake në Afganistan, në "nivele të papritura" për të dëbuar forcat e huaja nga vendi.

USA. Aktori domenikan Nelson de la Rosa, i konsideruar si burri më i shkurtër në botë vdiq sot në Nju Jork dhe do të varroset në Republikën Domenikane , njoftonte e përditshmja spanjolle “El Pais” . De la Rosa, 54 centimetra i gjatë u bë i famshëm kur interpretoi në 1996 së bashku me Marlon Brando në filmin “Ishulli i Dr.Moreau”. Sipas “El Pais”, problemet me shëndetin aktorit, 39 vjeçar, iu shfaqën teksa fluturonte me një avion nga Kili në Boston, mbasi kishte marrë pjesë në një spektakël në këtë vend amerikano-jugor .

MADRID. Shtypi spanjoll ka pershendetur te henen fitoren e dyte radhazi te Fernando Alonso, si "padron i ri te Formula 1", pas gares te se dieles per Cmimin e madh te Brazilit, ku fitoi ndaj rivalit te madh, gjermanit Michael Schumacher. "Alonso do te jete piloti me i madh ne histori", titullonte nje shkrim gazeta sportive Marca, shoqeruar me nje foto te dy here kampionit te botes me flamurin spanjoll.

ELBASAN. Besimtarët myslimanë elbasanas kanë kryer sot faljen e Ditës së Bajramit të Madh, pas një muaj agjërimi. Falja u krye në orët e para të mëngjesit në ambientet e Pallatit të Sportit "Tomorr Sinani". Myftiu i Elbasanit, Agim Duka, ka uruar të gjithë besimtarët myslimanë të rrethit të Elbasanit, por dhe të gjithë Shqipërisë, Kosovës, Maqedonisë dhe Malit të Zi, për mbarësi dhe gëzime.

SARANDË. Një armë luftarake granatëhedhëse u gjet mbrëmjen e kaluar brenda një vendstrehimi, në lagjen nr. 1 të qytetit të Sarandës, nga disa fëmijë. Burime zyrtare nga policia lokale thanë sot se "arma luftarake u gjet nga fëmijët e lagjes nr.1 të qytetit, të cilët po luanin aty pranë". Sipas burimeve, në vendngjarje shkuan menjëherë njohës të armatimit dhe specialistë të kësaj fushe, duke sekuestruar më pas armën.

TIRANE. Kryeministri Berisha ka deklaruar se vendi ynë do të shtojë trupa ushtarake në Afganistan dhe se do çojë trupa në Liban. Sipas Berishës prioritet mbetet integrimi në NATO. Deklaratat e Berishës u bënë në tryezën e vendeve të Adriatikut. Në këtë tryezë ishte e pranishme edhe kryetarja e Kuvendit Topalli e cila duke iu referuar mocionin që opozita ka kërkuar ndaj saj tha se mocion mund të kërkohet vetëm nga Qeverisë. Sipas Topallit për kryetarin e Kuvendit mund të nisin procedurat për shkarkimin e saj.

KANBERRA. Australia është gati të dërgojë një nga luftanijet e saj për të ndihmuar në përforcimin e sanksioneve të OKB-së kundër Koresë së Veriut, meqenëse ka kryer një provë bërthamore, deklaroi sot Ministri i Mbrojtjes, Brendan Nelson. Nelson deklaroi për kanalin televiziv vendas se kishte gjasa që një anije e flotës t'i bashkohej përpjekjeve të ndërkombëtarëve për të kontrolluar anijet që hynë dhe dalin nga ujërat e Koresë së Veriut për t'u siguruar që ato nuk transportojnë materiale për prodhim armësh.