Një krim brenda familjes apo ekzekutimi i ndonjë prostitute nga vendet e Evropës Juglindore, që ndodhet tranzit në Shqipëri. Këto janë dy pistat ku janë përqendruar hetimet e zyrës së zbulimit të vrasjeve në Drejtorinë e Policisë së Tiranës. Në fakt, prerja e gjuhës është një mënyrë e njohur ekzekutimi nga organizatat kriminale, për personat që kanë treguar apo kanë qenë bashkëpunëtorë të grupeve rivale apo policisë. Në cilësinë e provave materiale të krimit, janë vetëm pak pjesë të një fashoje me të cilën është lidhur viktima. Policia nuk ka gjetur ndonjë thes, apo gjurmë të automjetit që mund të ketë transportuar viktimën dhe dëshmitë për persona të dyshimtë që i janë afruar liqenit, janë të pakta. Mungesa e identifikimit të viktimës i ka vështirësuar disi hetimet e policisë, ndërsa në mbrëmje, policia vendosi një shpërblim prej 50 mijë eurosh, për personin që do të sjellë informacione rreth krimit. Policia ka siguruar anonimatin e informatorit, ndërsa numri ku mund të jepet ky informacion, veç sallës operative 129 është edhe ai i zyrës së drejtorit të policisë së Tiranës, Muhamet Rrumbullaku; 042 34 876. Në fakt, në morg kishte pasur disa prindër të interesuar për të parë viktimën, por deri në orët e vona ajo nuk ishte identifikuar ende. Policia ka kryer edhe krahasimin e gjurmëve të gishtave të viktimës me ato të kontingjenteve të policisë, por edhe kjo mënyrë nuk ka mundur të sigurojë identitetin e viktimës.