Sulmuesi ukrainas, Andrei Shevçenko, ka shënuar golin e tij të parë në Premier Ligë, teksa i hapi rrugën fitores 2-1 që Çelsi arriti dje ndaj Portsmuthit, duke marrë kreun e klasifikimit. Ish-futbollisti i Milanit shënoi pas dhjetë ndeshjesh "agjërim", duke thyer rezistencën e miqve që zgjati deri në minutën e 55-të. Sheva kishte shënuar më parë vetëm në ndeshjen e Superkupës së Anglisë. Mesfushori Mikael Balak dyfishoi rezultatin dy minuta më vonë, përpara se Benxhamin Mvaruvari të ngushtonte diferencën për Portsmuthin në të 69-ën. Fitorja e ngjit skuadrën e Mourinjos tri pikë para Mançesterit që do të luajë sot në "Old Traford" me Liverpulin. Në ndeshjet e tjera të luajtura dje, Evertoni mundi 2-0 Shefildin e mbetur me dhjetë futbollistë. Ndërsa Uigani arriti fitoren e tij më të thellë në historinë e Premier Ligës, pasi "shkatërroi" 4-0 Mançester Sitin. Në barazim pa gola u mbyll sfida ndërmjet dy skuadrave të fundrenditjes.
"Old Traford". Emocionet dhe pasioni nuk do të mungojnë në sfidën mes Mançesterit dhe Liverpulit, por pritet që kësaj here mbrojtësi dhe kapiteni Geri Nevill t'i kontrollojë disi emocionet. Mbrojtësi i Anglisë dhe i Mançester Junajtid, në ndeshjen e sezonit të kaluar ku Rio Ferdinand shënoi golin e fitores në minutën e fundit, vrapoi gjatë të gjithë fushës duke bërtitur dhe duke treguar me krenari stemën e "Djajve" mbi fanellën e tij. Ai u gjobit me 5 mijë paund për mënyrën se si festoi fitoren dhe u paralajmërua për sjelljen e tij në të ardhmen. "A është e thënë që pas një rasti si ai, vetëm sa duhet të buzëqeshësh lehtë dhe të futesh menjëherë në dhomat e zhveshjes? - tha Nevill pas asaj ngjarjeje. - Njerëzit kërkojnë që futbollistët të jenë shumë të rregullt. A mos ndoshta kërkojnë që ne të jemi robotë?" Mançesteri kryesues me 19 pikë së bashku me Çelsin, po përjeton një periudhë shumë të mirë, sidomos pas fitores së tretë radhazi në Champions, me anë të së cilës siguruan kalimin në raundin tjetër. Liverpuli ka mundur francezët e Bordosë dhe po kërkon stabilitet në Premier Ligë, pasi gjendet në mesin e tabelës me vetëm 11 pikë nga tetë ndeshjet e para. Pritet rikthimi i kapitenit Stiven Xherrard. Mesfushori i Anglisë ka munguar në sfidën ndaj "zhirondinëve", për shkak të një dëmtimi.