Ministri i Jashtëm Besnik Mustafaj, bëri të ditur dje, se Komisioni Evropian ka përgatitur një draft marrëveshje, i cili ka si qëllim të liberalizojë regjimin e vizave mes vendeve të Bashkimit Evropian dhe Shqipërisë. Në një intervistë dhënë për televizionin “Klan”, shefi i diplomacisë shqiptare bëri publike 2 fazat, të cilat do të ndjekë procedura e liberalizimit të vizave. Në fazën e parë, sipas tij, parashikohet që nga liberalizimi i vizave të përfitojnë biznesmenët, gazetarët dhe studentët. Ndërsa në fazën e dytë, e cila në realitet është edhe më e vështira dhe e komplikuara, nga liberalizimi i vizave parashikohet të përfitojnë të gjithë qytetarët shqiptarë. Por drafti i hartuar nga Komisioni Evropian për liberalizimin e vizave, më parë duhet të marrë bekimin e Këshillit të Ministrave të Bashkimit Evropian. Vetëm pasi ky Këshill të ndezë dritën e gjelbër, Komisioni Evropian mund të nisë bisedimet për vënien në jetë të këtij drafti. Mustafaj përmend si avantazhe të vendit tonë në përpjekjen për liberalizimin e vizave mes Shqipërisë dhe BE-së, nënshkrimin nga pala shqiptare të marrëveshjes së ripranimit, si dhe përmirësimeve të dukshme që janë bërë në kontrollin dhe menaxhimin e kufijve të shtetit shqiptar nga ana e qeverisë shqiptare. Kreu i diplomacisë është optimist që brenda tre vjetësh do të përfundojë edhe ratifikimi i Marrëveshjes së Stabilizim- Asociimit, nga parlamentet e 25 vendeve të BE-së. Sipas tij, deri më tani janë mbi 10 vende midis tyre dhe shtete mjaft të fuqishme në BE, të cilat kanë siguruar se ratifikimin e MSA-së do ta kryejnë brenda vitit 2007. Zyrtarët e lartë shqiptarë në vazhdimësi u kanë kërkuar autoriteteve më të larta të BE-së, që të liberalizojnë vizat për qytetarët shqiptarë. Në përgjigje të këtyre kërkesave ka pasur dhe premtime pozitive. Zyrtari i lartë i Parlamentit Evropian, Franko Fratini, në disa takime të zhvilluara me qeveritarë shqiptarë ka premtuar se do të ndikojë për një liberalizim të vizave mes BE-së dhe Shqipërisë. Ngritja e siparit në këtë drejtim, do të hiqte vellon e izolimit me të cilën përballet aktualisht Shqipëria, sa i përket marrjes së vizave për në drejtim të vendeve të BE-së. Kjo do të eliminonte edhe trafikun e vizave, si dhe radhët e gjata përpara ambasadave. Por përpara se BE-ja të vendosë për këtë, shteti shqiptar duhet të plotësojë një seri standardesh demokratike. Në këtë drejtim, qeveritë e Tiranës kanë bërë shumë pak.