Kryetari i Bashkisë së Durrësit, Lefter Koka nuk do të rikandidojë më për këtë post. Në prag të zhvillimit të zgjedhjeve për pushtetin lokal, Koka bëri të ditur dje tërheqjen nga rikandidimi për postin e Kryetarit të Bashkisë së qytetit bregdetar, pa dhënë arsye konkrete mbi vendimin e marrë. “Arsyet për marrjen e këtij vendimi janë tejet personale”, - tha Koka pa dhënë më tej shpjegime se çfarë e shtyu në tërheqjen nga rikandidimi. Kohët e fundit Koka është shprehur i pakënaqur ndaj drejtuesit të Partisë Socialiste, çka është reflektuar edhe në marrëdhëniet e tyre. Përpos këtij fakti, kreu i Bashkisë së Durrësit nuk përmend arsye të tjera që e shtynë drejt tërheqjes, përveç atyre personale. Madje hidhet poshtë edhe fakti se në këtë vendim të tij ka ndikim edhe procesi hetimor që ka nisur ndaj vëllait të tij, Nard Koka. Lefter Koka, nuk pranoi dje se tërheqja nga rikandidimi ka të bëjë me procesin hetimor. “Vendimin për të mos rikandiduar e morra në një moment reflektimi”, - u shpreh ai pa dhënë detaje të tjera mbi vendimin. Koka është sulmuar shumë pas ardhjes në pushtet të Partisë Demokratike nga Kryeministri Sali Berisha. Ky i fundit e ka akuzuar ashpër, kreun e bashkisë së Durrësit si një nga kokat e klanit të zemunit dhe të përfshirë në korrupsion.
Bashkëpunimi
Vendimi i Kokës për mosrikandidim për postin e kreut të Bashkisë së Durrësit, nuk do të ndikojë në marrëdhëniet e tij me Partinë Socialiste. Kryetari theksoi dje se do të vazhdojë të jetë në shërbim të kësaj partie dhe të bashkëpunojë me të. “Do të angazhohem për të dhënë kontributin tim në zgjedhjet e ardhshme të pushtetit lokal për fitoren e së majtës në bashkinë e Durrësit”, - tha dje Koka. Ai e cilësoi si të suksesshme periudhën trevjeçare në drejtimin e Bashkisë së Durrësit. Për Kokën, bashkë me rezultatet e prekshme në infrastrukturën e qytetit, bashkia e Durrësit ka tashmë një filozofi të re komunikimi me qytetarët. Koka e vlerësoi si pozitive eksperiencën e tij në shërbim të qytetit të Durrësit. Lefter Koka e drejton bashkinë e qytetit bregdetar të Durrësit që prej vitit 2003. Mandati i tij përfundon këtë vit, ku pritet të zhvillohen edhe zgjedhjet për pushtetin lokal. Nëse Kuvendi arrin të miratojë ndryshimin e kushtetutës, mandati i të zgjedhurve vendorë, nuk do të jetë më tre vjet por katër. Kjo është pjesë e marrëveshjes politike të 30 gushtit të nënshkruar mes PD-PS, e vënë si një kusht nga opozita.