Marko van Basten kurrë s'i është dashur të shpjegojë çfarë tip lojtari ishte. Holandezi gjithmonë është shprehur më mirë me këmbë, duke shënuar një mori golash me Ajaksin, Milanin dhe me përfaqësuesen holandeze. Goli i shënuar në Mynih kundër Bashkimit Sovjetik në finalet e kampionatit europian 1988, mishëron më së miri karrierën e tij të jashtëzakonshme. Sot Van Basten është trajner i Holandës që kryeson grupin G eliminator me 10 pikë pas katër ndeshjesh.
Fitore argëtuese. Si futbollist, djaloshi nga Utrehti ndërthurte fantazinë holandeze me pragmatizmin italian, cilësi që e ngritën në stadin e kampionit. Sot, dora e Van Bastenit e ka rigjallëruar ndjeshëm formacionin holandez. "Mendoj se futbolli im nuk është as holandez e as italian", - shpjegon trajneri i "tulipanëve". - Dua që skuadra të fitojë dhe të luajë mirë. Eshtë e rëndësishme të argëtosh tifozët, por edhe të fitosh. E vërteta, si gjithmonë, ndodhet në mes: loja e mirë, thuajse gjithmonë, të çon drejt suksesit."
Idealizmi. "S'më pëlqen të humbas, por e admiroj lojën e mirë. Çdo herë që ulem në stol, dëshiroj të jem në një sfidë spektakolare. Më pëlqen kur një skuadër merr nismën dhe ndërton lojë. Natyrisht, duhet të bësh llogaritë me forcën e kundërshtarit dhe të vendosësh nëse ta leverdis apo jo të hidhesh menjëherë në sulm. Të gjithë duan të fitojnë; unë e pranoj edhe humbjen, sepse është pjesë e lojës. Të qahesh për një humbje, do të thotë të përqendrosh energjitë në mënyrën e gabuar. Duhet të mësosh ta pranosh humbjen, sidomos kur skuadra që të ka mundur, zotëron kampionë të kalibrit të Tierri Henrisë. Mund edhe të më gjykojnë si idealist dhe e di që ata që merren prej shumë vitesh me futboll, po e humbin këtë cilësi. Sidoqoftë, unë i mbaj fort idetë e mia". Mendësia e Van Bastenit është tipike e futbollit holandez. "Jam rritur me modulin 4-3-3; në Holandë është moduli më i përhapur dhe i preferuar. Kjo përbën avantazh për ne, sepse skuadrat e huaja nuk janë mësuar të përballen me dy lojtarë krahu të mirëfilltë. Ky detaj mund të rezultojë vendimtar për suksesin tonë".
Burimi i frymëzimit
Van Basten u emërua trajner i Holandës para dy vitesh, pa drejtuar kurrë më parë ndonjë skuadër. Fati i tij kanë qenë trajnerët e mëdhenj që e stërvitën kur ishte futbollist, duke i lejuar një kalim pa dhimbje nga fusha në stol. "Në karrierën time kam pasur shumë trajnerë të shquar. Me shumë prej tyre, raporti nuk ka qenë i lehtë, por kam mësuar shumë. Johan Krojf e konceptonte futbollin si kontroll topi, ndërsa Arrigo Saki na nxiste të bënim presion dhe të studionim lëvizjet e kundërshtarit. Fabio Kapelo më mësoi të ndjek suksesin në çdo situatë, edhe në momentet e vështira, ndërsa Rinus Mishels që më stërviti vetëm në kombëtare, më mësoi rëndësinë e organizimit të lojës."
Vendimi i drejtë
Krojfi ka luajtur një rol thelbësor në vendimin e Van Bastenit për të pranuar drejtimin e Holandës. "S'ma priste mendja të më ofrohej një stol kaq prestigjioz që në vitin tim të parë si trajner. Kisha punuar mirë me skuadrën e dytë të Ajaksit, por as që e ëndërroja një detyrë të tillë. Kur federata më kontaktoi të më propozonte stolin e Holandës, mendova se nuk isha akoma gati. Reflektova për 10 ditë dhe pasi fola me Krojfin, u binda që ta pranoja. Besoj se ishte vendim i drejtë".
Rëndësia e Krojfit
Që në fillim, Krojfi ishte një ndër mbështetësit më besnikë të Van Bastenit. "Krojfi vazhdon të mbulojë një rol shumë të rëndësishëm në futbollin holandez. Pata fatin të luaj me të, ta kem si trajner dhe shok. E njoh nga çdo aspekt dhe kjo më ka ndihmuar shumë. Eshtë një figurë shumë e rëndësishme për mua; përvoja e tij është thelbësore".
Shumë kohë të lirë
Por tani përgjegjësia është e gjitha mbi supet e Van Bastenit. "Siguria ime e vetme është dëshira për të fituar, që nuk është zbehur aspak me kalimin e viteve. Ana pozitive e kësaj pune është se të lejon të kesh shumë kohë të lirë", - ka përfunduar Van Basten me një buzëqeshje.

Nigel de Jong, mesfushori i Hamburgut, ka probleme me gjurin dhe nuk do të jetë i gatshëm për të paktën 4 javë, duke shtuar kështu infermierinë e klubit përpara ndeshjes së të dielës kundër Bajer Leverkusenit. Mesfushori holandez do t'i nënshtrohet operacionit në Amsterdam, bëri të ditur klubi në faqen zyrtare. Hamburgu që nuk ka fituar asnjë ndeshje në Bundesligë në këtë sezon, gjendet i parafundit në renditje.

Klaudio Pizarro është pezulluar nga kombëtarja e Perusë për një afat të papërcaktuar, për shkak se refuzimi për të luajtur në miqësoren kundër Kilit, u cilësua si shkelje e rregullave të Federatës së Futbollit. Pizarro u kthye në Gjermani për t'u stërvitur me Bajernin e Mynihut, duke munguar në miqësoren e dytë kundër Kilit më 11 tetor, të fituar nga Kili 1-0. Miqësoren e parë në transfertë më 7 tetor, Peruja e humbi 3-2. Lojtari ishte shprehur se drejtuesit e federatës s'e kishin miratuar kërkesën e tij për të mos luajtur, ndërkohë që federata e mohon një gjë të tillë.

Ouen Hargrivs, mesfushori anglez i Bajernit të Mynihut, po rikuperohet shpejt, pasi theu këmbën muajin e kaluar. Agjenti i tij, Roman Grill, konfirmoi se Oueni është drejt përmirësimit dhe i vendosur për të rifilluar stërvitjen sa më shpejt. "Hargrivsi është në gjendje shumë të mirë psikologjike dhe mezi pret të luajë sërish. Dëmtimi i erdhi në një moment të keq, por Oueni gjithmonë ka qenë optimist. Allçinë ia kanë hequr dhe shpreson të ecë pa probleme në këto dy-tri ditë". Hargrivsi pritet të kthehet në fushën e lojës nga fundi i nëntorit.

Oliver Noivill, lojtari i kombëtares gjermane, ka shprehur dëshirën për ta mbyllur karrierën me Borusian e Mynshengladbahut. "Dua ta përfundoj karrierën me Mynshengladbahun, - deklaron Noivilli, - kontrata ime skadon në 2008-n. S'e di nëse do të vazhdoj më tutje; duhet të shohim nëse do të zhvilloj dy sezone të mira këtu dhe nëse klubi më ofron një shtyrje të kontratës. Nuk kam pishmane të mëdha për karrierën time, por do të kishte qenë më mirë sikur të kisha luajtur më gjatë në Spanjë (vetëm një sezon me Tenerifen). Kampionati atje është më sulmues, ka më tepër hapësirë. Do të kisha dashur të luaja edhe në Angli. Sidoqoftë, jam i lumtur me karrierën time".

Loren Perper, ish-presidenti i Paris SG, është vënë në paraqitje të detyruar nga gjykata, për shkak të një hetimi për transferimet në klub gjatë drejtimit të tij. Perperi, president më 1998-2003, u përfshi në hetim nga gjykatësi Fransua Dese, i cili të mërkurën sanksionoi të njëjtën masë edhe për agjentin Roberto Rodrigez. Rodrigezi po merret në pyetje për transferimet e tre lojtarëve argjentinas: mbrojtësi Gabriel Hajnze (u transferua në 2001-shin nga Valadolidi), sulmuesi Martin Kardeti (2002) dhe mbrojtësi Mauricio Poketino (u transferua në 2001 nga Espanjoli).

Gi Lakomb, trajneri i Paris SG, ka dalë në mbrojtje të sulmuesit Pierr-Alen Frau, që është vënë në qendër të kritikave. Frau u ndëshkua me karton të kuq për një ndërhyrje të rëndë ndaj Stefan Noro të Sedanit, në ndeshjen e fituar 4-2 në fundjavë. "Veprimi i tij është i dënueshëm, - deklaron Lakombi. - Bëri një ndërhyrje të parregullt, sepse donte të korrigjonte gabimin teknik. Si sulmues, ai ka marrë shumë ndërhyrje të tilla. Frau është i vetëdijshëm që bëri një gabim të madh. Për këtë mori një karton të kuq dhe të mos harrojmë që ky është kartoni i parë i kuq në karrierën e Fraut".