Goli ka qenë kaq i bukur, sa tifozët kundërshtarë u ngritën në këmbë për ta duartrokitur. Në ndeshjen e parë të Realit të Madridit, në stadiumin e Steauas, Rud Van Nistëlroi u dhuroi 25 mijë tifozëve rumunë një "perlë" nga repertori i tij, duke mposhtur portierin kundërshtar, Karlos Fernandez, me një parabël "të mrekullueshme" dhe të papritshme.
I pakapshëm. Goli i shkëlqyer përkon me të 50-in e shënuar nga holandezi në Ligën e Kampioneve, përfshi edhe ndeshjet paraeliminatore. Pasi ka shënuar nëntë gola me PSV Eindhovenin, 38 me Mançesterin dhe tre me Realin, Van Nistëlroi arrin kështu një legjendë të futbollit europian si Alfredo Di Stefano. "E vura re që mbrojtja nuk ishte e pozicionuar mirë, u shkëputa dhe Diarra ma shërbeu topin ashtu siç e kërkoja, - tregon "bomberi" 30-vjeçar. - Pasi hyra në zonë, vura re se portieri po dilte dhe për një moment hezitova. Në atë pikë mendova se mënyra e vetme për ta kaluar, ishte ta godisja topin nga poshtë dhe e realizova ashtu si duhet."
Arritja e Bekhamit. Goli i shënuar në minutën e 76-të, ishte arritja e dytë për Realin në të njëjtën mbrëmje. E para kishte ndodhur pesë minuta më parë, kur me aktivizimin e tij Bekhami shënoi praninë numër 100 në Ligën e Kampioneve. Van Nistëlroi dhe Bekhami njihen që në kohën kur luanin me Mançesterin. "E dija që Rudi do të shënonte, - tha ish-kapiteni i kombëtares angleze. - E vura re që e pa portierin përpara se t'i vinte topi. Ai është një nga sulmuesit më të mirë në botë dhe goditje të tilla i ka në repertor."
Ndeshja e preferuar. Bekhami, nga ana e tij, mund të krenohet me një "mal" me kujtime nga këto 100 ndeshje në Champions. Pa dyshim më i lumturi është ai i vitit 1999, kur Mançesteri fitoi Championsin në finalen ndaj Bajernit. "Djajtë" e Fergusonit shënuan dy herë në tri minutat shtesë, duke përmbysur golin e gjermanëve dhe duke fituar trofeun më prestigjioz. Por nuk mund të harrohet as ndeshja e parë, kur Devidi 19-vjeçar aktivizohej më 7 dhjetor 1994, ndaj Gallatasarajit. "Ajo është një nga ndeshjet më të preferuara, - kujton 31-vjeçari Bekham. - Mbaj mend që shënova dhe festën pas ndeshjes me Kantonanë. Mbetet një moment i paharrueshëm në turneun më të rëndësishëm. Kam luajtur me Mançesterin dhe tani po provoj me Realin të njëjtat kënaqësi." Bekhami, i cili ka shënuar 16 gola në Ligën e Kampioneve, është i treti për sa i përket numrit të ndeshjeve të luajtura në këtë veprimtari, pas Roberto Karlosit (104) dhe Raulit (102).
Ambiciet europiane - Sipas Bekhamit, ndeshja e Bukureshtit ishte e rëndësishme për të heshtur kritikat pas humbjes në kampionat ndaj Getafes. "Reali është pretendent për fitore në çdo sezon, - saktëson anglezi. - Nëse do të luajmë si ndaj Steauas, mundësitë për t'ia dalë mbanë janë shumë të mëdha. Luajtëm një ndeshje shumë të mirë, duke treguar se cili është futbolli që mund të prodhojmë." Ndërkohë, nën drejtimin e Kapelos, Bekhami nuk e ka vendin e titullarit të garantuar dhe ashtu siç ndodhi në Rumani, mund ta nisë ndeshjen edhe nga stoli. "Nuk kam asnjë për t'u ankuar, - vazhdon ai. - Në Bukuresht luajta për 25 minuta dhe jam i kënaqur. Jemi një grup i bashkuar dhe e rëndësishme është që morëm tri pikët."
Çështje karakteri - Van Nistëlroi ka konfirmuar fjalët e kolegut: "Kemi dominuar me qarkullimin e topit dhe kemi pasur shumë raste për shënim. Mendoj se kjo është ajo që tifozët kërkojnë nga Reali i Madridit. Duhej të bënim kthesën pas humbjes së të shtunës dhe ia arritëm. Treguam se kemi karakter. Humbja ndaj Getafes ishte një sinjal alarmi që skuadra e shfrytëzoi për të bërë kthesën." Pra, duket se është rikthyer morali i duhur te "merengesit" dhe Barcelona të dielën në "El Klasiko" është paralajmëruar.