Nuk e kishin parë kurrë njëri-tjetrin, u njohën nëpërmjet letrave kur ndodheshin të dy në burg, fituan lirinë dhe përfundojnë sërish të dy në burg, mbas vetëm pesë muajsh bashkëjetesë. Pasi të dy bashkë kishin nisur të grabisnin për të fituar paratë që iu duheshin për të bashkëjetuar. Përsëritet në kryeqytet historia e dy grabitësve të makinave Bonnie dhe Clady, të filmit të Hollywod që mban pikërisht emrat dy protagonistëve "Bonnie&Clady". Dy protagonistët shqiptar të kësaj historie, Spartak Aliaj, 21 vjeç nga Shkodra dhe Silvi Bajrami, po 21 vjeçe nga Vlora, kanë pasur të njëjtin fund si personazhet në film dhe tashmë ndodhen të siguruar me akuzën e grabitjes me dhunë me pasojë plagosje, në qeli të veçanta në Komisariatin numër 1 të Policisë së Tiranës. Në pranga ka përfunduar edhe miku i tyre, Imer Huti, 18 vjeç, lindur në Shkodër dhe banues në lagjen "Ali Demi", në kryeqytet. Ata akuzohen se kanë sulmuar dhe grabitur taksistin 60-vjeçar Llazo Bullaci, i cili ndodhet në gjendje të rëndë në spital, i goditur disa herë në me thikë në shpatull dhe fytyrë.
Si u njohën?
Të burgosurit e tjerë janë bërë "shkuesit" e dashurisë që do niste nga qelitë e burgut. Spartak Aliaj ndodhej në burgun e Burrelit, ku shlyente dënimin për vjedhje, kurse Silvi Bajrami në burgun 325 të Tiranës. Kanë shkëmbyer korrespondencë nëpërmjet letrave, dhe kanë pritur njëri-tjetrin të dalin nga burgu. Një dashuri në shikim të parë, janë pëlqyer menjëherë dhe kishin 5 muaj që bashkëjetonin në një shtëpi në lagjen "Ali Demi", në kryeqytet. Këtu Bonnie dhe Clady shqiptar, bënin planet e jetës së tyre për përballimin e së cilës duhej riktheshin në "zanatin" e vjetër, duke vepruar si grabitës profesionistë.
Grabitja
Ka ndodhur përnjëherë me vrasjen e Dritan Shemes në rrugën "Don Bosko", saqë u dyshua se bëhej fjalë për të njëjtën ngjarje. Aliaj dhe e dashura, Bajrami, si dhe miku i tyre, Huti, kanë prenotuar taksinë Benz të Bullacit me targa TR 9395 F, në rrugën "Ali Demi". E kishin marrë edhe një ditë më parë, për të studiuar mënyrën më të mundshme të grabitjes së saj. E kanë dërguar fillimisht për në Malin e Dajtit, në drejtim të Linzës, por siç duket e kanë parë të pamundur ta realizonin këtu grabitjen. Me pretekstin se lokali që kërkonin ishte i mbyllur, ata e kanë drejtuar makinën për në Liqenin e Farkës. Në një rrugicë të errët ata me një thikë kanë kërcënuar taksistin që të ndalonte. Por në momentin që ishin duke e lidhur me ngjitëse "natriban", të cilën e kishin me vete, taksisti ka reaguar dhe është përleshur me ta. Për pasojë është goditur me grushte dhe me thikë në shpatull dhe në fytyrë, por ka mundur t'u shpëtojë grabitësve. Këta ta fundit kanë marrë makinën dhe janë larguar. Por dëshmia e taksistit në polici dhe përshkrimi i kryer i ka bërë lehtësisht të identifikueshëm nga skuadra e antikrimit e Komisariatit numër 1 të Policisë së Tiranës. Taksia e rrëmbyer është kapur në mesnatë duke gdhirë dita e djeshme në Lezhë dhe dyshohet se të arrestuarit do e çmontonin në ndonjë prej serviseve të kësaj zone.