Situata e paparashikuar energjetike, duket se është një nga arsyet kryesore që Kryeministri Sali Berisha, këmbëngul që zgjedhjet vendore të zhvillohen në dhjetor të këtij viti, apo sikurse ka shprehur datën 17 dhjetor. Koperturë për këtë qëllim po përdoren afatet kushtetuese të zgjedhjeve. Opozita ka deklaruar se zhvillimi i zgjedhjeve në të gjithë vendin në mesin e dimrit, është tërësisht i papërshtatshëm, për shkak të vështirësive që mbart procesi si pasojë e të ftohtit, errësirës, rrugëve të bllokuara, ngricave, shirave etj. etj.
Kundërshtimi i lidershipit të PD-së, për të arritur një konsensus me opozitën që zhvillimi i zgjedhjeve të bëhet në fillim të pranverës, më shumë se me respektimin e afateve kushtetuese duket se ka të bëjë me faktin se askush në qeveri nuk është në gjendje të parashikojë sesi do të jetë situata energjetike gjatë muajve janar dhe shkurt 2007. Mungesa e energjisë elektrike, oraret e kufizimit, ndërprerjet e vazhdueshme të energjisë, detyrimisht do të çonin në pakënaqësi tek njerëzit, do të jepte si pasojë një krizë ekonomike, gjë që sipas njërit prej këshilltarëve të Kryeministrit, “do të kishte efekte të pashmangshme elektorale”. “Çdo krizë, e çdo natyre qoftë, përkthehet në problematikë elektorale”, - nënvizon për “Gazeta Shqiptare”, një prej këshilltarëve të Kryeministrit Berisha, i cili kërkon që të mos citohet me emër. Ripërsëritja e krizës energjetike e vitit të kaluar, mendohet se do të kishte pasoja mjaft të rënda për qeverinë, sa i përket rezultatit të votimit.
Problematika
Ministri i Energjetikës, Genc Ruli bëri të ditur pak kohë më parë, se qeveria ka siguruar energji elektrike deri në fund të muajit dhjetor të vitit 2006. Ai deklaroi se vendi nuk do të përballet me krizë energjetike. Por ndërsa duket se është zgjidhur problemi i energjisë deri në fund të dhjetorit, nga muaji janar dhe në vazhdim, nuk është e qartë se cila është perspektiva e furnizimit me energji elektrike. Në vendin tonë ka muaj që nuk bien shira, moti ka filluar të ftohet, ndërsa rezervat ujore në hidrocentrale kanë filluar të pakësohen. E gjithë kjo situatë, të jep vetëm idenë e një krize që po përgatitet të “trokasë në derë”. Qeveria po heziton të hapë tender për blerje të energjisë elektrike, me shpresën e fillimit të rënies së shirave. Nga ana tjetër, edhe vetë tenderat e hapura nga qeveria për blerje të energjisë, kanë qenë të dështuara, me gjithë ndryshimet e njëpasnjëshme ligjore që ajo bëri. Kjo bëri që qeveria ta blejë energjinë “sa frëngu pulën”, gjë që solli dhe një rritje galopante të çmimit të energjisë elektrike për konsumatorët familjarë dhe atyre të afrofesë. Mungesa e energjisë, oraret e kufizimit të energjisë, si dhe rritja e çmimit, mendohet se janë elementë të cilët do të sjellin detyrimisht efekte elektorale. Ndërsa skema e kompensimit të energjisë, duket se ka fatin e skemës së naftës pa akcizë, thjesht është e dështuar.
Zgjedhjet
Zhvillimi i zgjedhjeve në dhjetor apo fillim janari, do të bënte që kriza e energjisë elektrike të mund të administrohej nga ana e qeverisë. Ndërsa shtrirja në kohë e zgjedhjeve për në fillim të pranverës, nuk do të bënte gjë tjetër, vetëm se do ta vinte jo pak në telashe qeverinë, pasi mungesa e energjisë dhe mospërgatitjet e saj për të përballuar krizën në fjalë, do të shfrytëzoheshin nga opozita gjatë fushatës elektorale. Kjo krizë do të reflektohej në një masë jo të pakët edhe në rezultatin e zgjedhjeve. Në këto rrethana, qeveria është e detyruar të lëvizë me kartën e afateve kushtetuese, me qëllim për të minimizuar pakënaqësinë që do të buronte nga ky problem, për të mos u reflektuar gjatë zgjedhjeve.