Ka të reja në shtëpinë e Juves. Skuadra bardhezi kërkon me zë të lartë që të mos bëhet më fjalë për të ashtuquajturën "Zonja e vjetër". Skandali i verës e zbriti në Serinë B, por i ka dhënë një fytyrë më të re, më të pastër, para së gjithash më të rinuar. Pra, duhet thënë "Zonja e re", duke parë fytyrën e freskët të drejtorit sportiv Alesio Seko, 36 vjeç, ish-zëdhënës shtypi te klubi. Aktualisht në moshën 33-vjeçare, Seko ka punuar jo pak në krah të Moxhit. 13 janë vitet që ndajnë administratorin e ri të deleguar Blank nga ish-Xhiraudo. Ndërsa 18 janë vitet diferencë që e ndajnë Didië Deshampin nga Fabio Kapelo, sot në stolin e Realit të Madridit. "Kam mësuar shumë nga Moxhi dhe Xhiraudo, - pranoi Seko. - Me ta kam mësuar të lëviz në këtë mënyrë. Kam menduar shumë për gabimet që nuk duhen bërë, për shembull të flasim pak dhe të merremi vetëm me gjërat tona. Moxhi privilegjonte shumë njerëz, vlerësohej nga ata, por tani u mbyll një epokë. Ai jeton pak kilometra prej këtej, por asnjëherë nuk ka ardhur në klub ose na ka telefonuar për të na prishur projektet. Unë pasardhësi i tij? Më vjen të qesh. Nuk jam dhe nuk do të jem asnjëherë "mbreti" i merkatos. Përforcimet për A-në? Ekzistojnë, por më parë duhet të kthehemi."