Çelsi kryeson i shkëputur me 5 pikë në grupin e Ligës së Kampioneve, pavarësisht se Shevçenko s'po gjen rrugën e golit. Trajneri Mourinjo s'ka ndër mend ta lërë në stol sulmuesin ukrainas, të blerë 29 milionë paund (54 milion dollarë), madje ka vlerësuar kontributin e tij për skuadrën. Sheva ishte kolegu i Didië Drogbasë, që me golin fantastik në minutën e 47-të u dha fitoren 1-0 kampionëve të Anglisë kundër Barcelonës, kampiones në fuqi të "Champions"-it. Bashkë me tregolëshin e shënuar për Çelsin kundër Levskit në fitoren 3-1, Drogba bëhet shënuesi më i mirë i kompeticionit deri tani. Shevçenko, shënuesi më i mirë aktiv në "Champions" me 56 gola gjithsej për Dinamon e Kievit dhe Milanin, akoma nuk ka bërë "sefte" në Ligën e Kampioneve për klubin e ri. Ai s'ka shënuar në nëntë ndeshje rresht që nga humbja e vetme e Çelsit në Premier Ligë: kundër Misdëllsbrout në 23 gusht. Por Mourinjo vazhdon ta mbajë titullar, i bindur se Sheva do të kthehet në formë. I pyetur nëse do të vazhdojë t'i besojë 30-vjeçarit ukrainas, Mourinjo u përgjigj: "Në çdo ndeshje, pa dyshim, vetëm nëse ka ndonjë problem fizik ose unë vendos ta lë pushim, për shkak të rotacionit". Mourinjo shtoi se me një kalendar kaq të ngjeshur, sulmuesit mund t'i duhet një ndeshje pushim për të ripërtërirë fuqitë. Shevçenko ka luajtur në çdo ndeshje deri tani për kampionët e Anglisë. Kundër Barçës tregoi disa momente klasi dhe iu afrua golit nga një herë në secilën pjesë. Mourinjo deklaroi se kontributi i ukrainasit ishte i paçmuar. "Ndeshjen e fituan Drogba dhe Shevçenko, bashkë me nëntë lojtarët e tjerë në fushë. Ndoshta në mars Sheva do të shënojë dhe Didië jo kaq shumë. Ne luajmë si skuadër dhe për ne skuadra është më e rëndësishme sesa individët". Çelsi mundi 2-0 Verder Bremenin në ndeshjen e parë të grupit A dhe me tri fitore në tri ndeshje deri tani mund të thuhet se "blutë" e kanë siguruar kualifikimin në fazën me eliminim, çka i jep Shevçenkos edhe një mundësi më tepër për të shënuar. Hoze Mourinjo lëvdoi portierin e tretë, Hilario, pasi debutuesi portugez e ruajti të paprekur portën kundër kampionëve të Europës, Barcelonës. "Hilario demonstroi siguri që në momentin e parë, - tha Mourinjo për bashkëkombasin e blerë me parametra zero nga Nacionali në qershorin e kaluar. - Ekipi i dha besim dhe ai zhvilloi një ndeshje shumë të mirë". Hilario, pak i njohur para këtij takimi ku rastësisht i erdhi radha për të luajtur, pasi dy portierët e parë u dëmtuan kundër Ridingut të shtunën, sprapsi me siguri gjuajtjet e Ronaldinjos me shokë. Petr Çeh do të mungojë disa muaj, për shkak se pësoi frakturë në kafkë, kurse Kudiçini do të jetë i gatshëm që javës tjetër. Mourinjo tha se agjentët e "mbytën" me telefonata për t'i ofruar portierë dhe shtoi se Bartezi, i sugjeruar nga mediat si zëvendësues i mundshëm, nuk është në planet e Çelsit: "Ne duam portier të tretë dhe Fabien Bartez nuk është i tillë. Ai është portier klasi". Në lidhje me fitoren kundër Barçës, Mourinjo tha se ekipi luajti mirë dhe e meritoi fitoren. "Ishte një ndeshje e vështirë, por luajtëm shumë mirë si ekip dhe si individë. Tani jemi pesë pikë para dhe me njërën këmbë në fazën tjetër". Mourinjo tha se fitorja ndryshoi objektivin e Çelsit, nga kualifikim në fitimin e grupit. "E di që kemi dy ndeshje jashtë dhe një brenda, por kemi pesë pikë avantazh", - tha ai. Çelsi shkon në "Kamp Nou" në ndeshjen e kthimit më 31 tetor dhe pastaj do të ndeshet me Verder Bremenin në Gjermani, para se të presin Levskin e Sofjes në "Stamford Brixh" në dhjetor.