Trajneri i Mançester Junajtid, Aleks Ferguson, ka përgëzuar Uejn Runin pas ndeshjes së mrekullueshme ndaj danezëve të Kopenhagenit, pasi anglezët kanë fituar 3-0 në "Old Traford" në ndeshjen e tretë të grupit. Runi ka marrë shiritin e kapitenit vetëm 15 minuta përpara fillimit të ndeshjes, pasi si Rajan Gigs, ashtu dhe Rio Ferdinand nuk kanë luajtur në ndeshjen e tretë të grupit F. Në mungesë të të dëmtuarit Geri Nevill, Gigsi kishte radhën për të marrë shiritin e kapitenit, por ai nuk ka qenë në gjendje për të luajtur në sfidën ndaj danezëve. Ferdinandi, një kandidat i fortë për shiritin, u dëmtua gjatë nxehjes përpara fillimit të ndeshjes. Duke parë lojtarët që i mungonin, Fergusoni ka menduar një herë për portierin holandez, Van der Sar, megjithatë deklaroi pas ndeshjes se Runi ishte zgjedhja e duhur. "Me personalitetin dhe eksperiencën e Van der Sarit, mbase duhej të kisha zgjedhur atë, por po kërkoja një lojtar në repartet e tjera dhe që mund të ishte i gatshëm për këtë detyrë. Pol Skols nuk dëshiron të jetë më kapiten dhe zgjedhja u bë mjaft e thjeshtë". I kënaqur nga një ndeshje tjetër ku Runi ka treguar formë të mirë, Fergusoni tha: "Ai ishte fantastik. Është rikthyer në formë, ashtu siç prisnim".
Runi - "Isha i kënaqur që mora shiritin e kapitenit, por kjo nuk ishte e vetmja gjë e veçantë e kësaj nate, - tha Runi. - Jemi të kënaqur, shënuam tre gola dhe fituam tri pikë, ishte një fitore e rëndësishme. Forma ime po përmirësohet dita-ditës. Jam i kënaqur me formën që po kaloj që nga ndeshja me Uiganin. Pak a shumë jam kthyer në formën time më të mirë". Runi nuk shënoi, por krijoi shumë raste për shokët e tjerë të skuadrës. Sëlltiku ndodhet në vendin e dytë në grup, pasi ka mundur Benfikën me rezultatin 2-0. Skolsi shënoi golin e parë në minutën e 39-të dhe një gol i Xhon O'Shisë në minutat e para të pjesës së dytë dyfishoi avantazhin e Mançesterit. Kieran Riçardson shënoi golin e tretë dhe anglezët kanë shmangur eliminimin e turpshëm të vitit të kaluar që në fazën e grupeve. Fergusoni shtoi: "Shqetësimi im i vetëm është se nuk arritëm të shfrytëzonim shanset për shënim që na u paraqitën në pjesën e parë. Ata ishin një skuadër e mirë teknikisht dhe mendoj se nënvlerësohen pa të drejtë në grupin tonë. Goli i dytë ishte i rëndësishëm për ne. E mbajmë mend shumë mirë vitin e kaluar dhe nuk donim që ajo situatë të përsëritej. Kundërshtarët luanin një futboll shumë cilësor".
Kopenhagen - Trajneri i Kopenhagenit, Stale Solbaken, ka qenë i kënaqur me lojën e skuadrës së tij, duke thënë: "Humbëm ndaj skuadrës më të mirë në grup, por shpresat për të ardhmen na janë shtuar së tepërmi. Luajtëm shumë mirë në pjesën e parë dhe krijuam disa shanse për të shënuar. Eshtë vetëm ndeshja e tretë që kemi luajtur në Ligën e Kampioneve dhe deri tani kemi mësuar shumë. Shumë nga lojtarët tanë treguan se mund të luajnë në këto nivele".
Driten VISHA

K.Ronaldo: Jemi më të maturuar
Kristiano Ronaldo ka deklaruar se tashmë Mançesteri është një skuadër më e maturuar, pas fitores së djeshme që e konsolidoi shumë pozitën në grupin F. "Është një fillim i mbarë, tri ndeshje, tri rezultate të mira dhe jemi vetëm një hap larg raundit të dytë, - tha Kristiano Ronaldo. - Vitin e kaluar nuk luajtëm shumë mirë në Ligën e Kampioneve, por këtë vit skuadra është më e maturuar dhe më kompakte. Kopenhageni kishte një skuadër të mirë, por krijuam më shumë shanse dhe e merituam fitoren".