Dje u luajtën ndeshjet e raundit të tretë në grupet A, B, C dhe D. Çelsi, Valencia dhe Bajerni janë tri skuadrat që vazhdojnë të kenë kuotë të plotë pikësh.
Grupi A
Çelsi mund kampionët - Një gol i mrekullueshëm i Didië Drogbasë i ka dhënë Çelsit fitoren 1-0 ndaj Barcelonës në "Stemford Bridge". Sulmuesi i Bregut të Fildishtë ka marrë një pasim nga Eshli Kol dhe nga jashtë zonës ka lëshuar një goditje, e cila ka thyer portierin Viktor Valdez në minutën e 47-të të pjesës së dytë. Kjo fitore e merituar e ka mbajtur Çelsin në krye të grupit A, me nëntë pikë në tri ndeshjet e para dhe duke siguruar tashmë një vend në fazën e 1/8. Kjo ka qenë përballja e tretë në tri sezonet e fundit të Ligës së Kampioneve mes këtyre dy "gjigantëve" të futbollit europian. Barça ka eliminuar Çelsin në sezonin e shkuar, ku fitoi edhe trofeun e kampiones së Europës. Humbja e djeshmje ka qenë e para për Barcelonën pas 16 ndeshjesh pa u mundur.
Verderi, fitorja e pritur - Një goditje dënimi e ekzekutuar nga Naldo dhe gol tjetër i shënuar nga braziliani Diego i kanë dhënë Verder Bremenit fitoren 2 0 ndaj Levskit të Sofjes, duke rritur kështu shpresat e gjermanëve për një kualifikim në raundin tjetër. Goditja e dënimit, e ekzekutuar nga Naldo në kohën shtesë të pjesës së parë, ka prekur një herë shtyllën dhe më pas është futur në rrjetë, ku portieri Petkov nuk ka mundur të bëjë më shumë se të shoqërojë topin me sy. Verderi e ka pasur disi të vështirë në pjesën e dytë dhe bullgarët kanë rrezikuar seriozisht avantazhin e gjermanëve, me një rast të shpërdoruar nga Valeri Domovçijski. Ata kanë rifituar kontrollin e ndeshjes dhe e kanë siguruar fitoren në minutën e 73-të, me anë të një goditjeje nga braziliani Diego. Gjermanët kanë grumbulluar katër pikë në tri ndeshjet e para, po aq sa Barcelona që ka humbur 1-0 ndaj Çelsit. Anglezët kryesojnë grupin me nëntë pikë, ndërsa Levski nuk ka grumbulluar asnjë pikë në sezonin e parë të tij në Champions.
Grupi B
Kruz "shpëton" Interin - Argjentinasi Hulio Rikardo Kruz shënoi dy herë për Interin në fitoren 2-1 që zikaltrit arritën ndaj Spartakut të Moskës, duke grumbulluar kështu edhe pikët e para në Champions pas tri ndeshjeve. Kruzi u aktivizua që nga minuta e parë nga Roberto Mançini përkrah Rekobës dhe sulmuesi ia shpërbleu në mënyrën më të mirë të mundshme, duke shënuar dy herë në nëntë minutat e para, në një kohë që braziliani Adriano vazhdon të vuajë në stol. Spartaku u fut në lojë falë golit të shënuar nga Roman Pavljuçenko, në minutën e 54-t. Rusi u tregua i aftë pas një krosimi të ulët nga Bojarintsev. Por ky i fundit shpërdoroi rastin më të mirë për të barazuar, kur pak minuta nga fundi tentativa e tij u ndal nga portieri Hulio Sezar.
Bajerni, suksesi i vuajtur - Një ndeshje e mrekullueshme e portierit veteran, Oliver Kahn, ka ndihmuar Bajernin e Mynihut që e ka mbyllur ndeshjen me 10 lojtarë të fitojë 1-0 ndaj Sportingut të Lisbonës dhe të arrijë maksimumin e pikëve të mundshme nga tri ndeshje. Mesfushori Bastian Shvainshtaiger shënoi një gol të mrekullueshëm në minutën e 19-të, i cili ishte deciziv, por nuk ka arritur ta mbyllë ndeshjen si hero, pasi në minutën e 47-të është nxjerrë me karton të kuq për një faull ndaj Janikut. Sportingu është hedhur i tëri në sulm, në kërkim të golit të barazimit, por nuk ka arritur të kalojë portierin Oliver Kahn. Të vetmen herë që ai është thyer, në ndihmë i ka ardhur shtylla e majtë. Bajerni i Mynihut kryeson grupin me nëntë pikë në tri ndeshje, i ndjekur nga Sportingu i Lisbonës me katër pikë, Interi me tre dhe Spartaku i Moskës me vetëm një.
Grupi C
Vendos Piter Krouç - Një gol i shënuar me kokë në pjesën e dytë, nga Piter Krouç, i dha Liverpulit fitoren 1-0 në ndeshjen e luajtur mbrëmë ndaj Bordosë. Krouçi realizoi në të 58-n pas një goditjeje këndi të ekzekutuar nga Bellami dhe i dha mundësinë Liverpulit të ngjitet në kuotën e shtatë pikëve, të cilat i lejojnë të jenë më pranë kalimit në 1/8-t e finaleve të Ligës së Kampioneve. Në vendin e dytë të grupit ndodhet PSV-ja, gjithashtu me shtatë pikë, ndërsa Bordoja dhe Gallastasaraji kanë nga një pikë. Liverpuli, i cili këtë fundjavë do të ndeshet me Mançesterin në "Old Traford", luajti pa kapitenin Stiven Xherrard.
PSV-ja "habit" Stambollin - PSV-ja ka rikuperuar një gol disavantazh dhe ka mundur turqit e Gallatasarajit me rezultatin 2 1 dhe duke u vendosur në një pozitë të mirë në grupin C. Gallatasaraji ka dominuar në pjesën e parë dhe mesfushori serb, Sasha Iliç, i ka kaluar në avantazh në minutën e 19-të, i shërbyer nga Umit Karan. PSV-ja ka marrë në kontroll ndeshjen pas pjesës së parë dhe mbrojtësi Jan Kronkamp ka barazuar shifrat në minutën e 59-të, pas një depërtimi nga e djathta. Sulmuesi i Bregut të Fildishtë, Aruna Kone, ka vulosur fitoren në minutën e 72-të dhe duke arritur kuotën e shtatë pikëve, por më poshtë Liverpulit për shkak të golaverazhit.
Grupi D
Vila-Shahktar 2-0 - David Vila ka shënuar dy gola në pjesën e parë dhe ka siguruar fitoren 2-0 për spanjollët ndaj Shakhtjarit dhe kështu Valencia ka mbajtur të njëjtin ritëm në Ligën e Kampioneve. Sulmuesi i Spanjës ka shënuar në minutën e 31-të, pasi ka kaluar me vështirësi portierin Shtipe Pletikosa dhe ka thelluar avantazhin me një goditje me kokë në minutën e fundit të pjesës së parë. Shakhtjari e ka mbyllur ndeshjen me 10 futbollistë në fushë, pasi mbrojtësi Viaçeslav Sviderski ka marrë kartonin e dytë të verdhë vetëm 14 minuta nga përfundimi i takimit. Kjo fitore e ka mbajtur Valencian në krye të grupit D me nëntë pikë, ndërsa Shakhtjari mbetet në fund të tabelës me vetëm një pikë në tri ndeshjet e para.
Roma, tri pikë në Athinë - Një gol i shënuar në fund nga Simone Perrota i dha Romës një fitore deri diku fatlume ndaj Olimpiakosit, në ndeshjen e luajtur dje në Athinë. Ky rezultat u jep mundësinë verdhekuqve të ngjiten në kuotën e gjashtë pikëve, në vendin e dytë të grupit D, pas Valencias që kryeson me nëntë. Olimpiakosi pati shumë raste për shënim dhe në dy episode vetëm fati nuk ishte me Kostandinoiun. Roma, futbollistët e së cilës luanin me shiritin e zi në krah, për shkak të aksidentit në metronë e kryeqytetit italian, realizoi dhjetë minuta nga fundi i takimit kur Perrota u tregua i aftë pas krosimit të marrë nga Alesandro Rosi.