Paskali: Staf akademik italian dhe po ashtu një diplomë italiane

Tirane

Nëse do t’ju duhet një diplomë universitare italiane, tashmë nuk keni nevojë të shkoni për studime në Itali. Universiteti italian “SAN PIO V” i Romës, në bashkëpunim me “Wisdom University” kanë hapur filialin e tyre në Tiranë, pas vendimit të qeverisë për dhënien e lejes për hapjen e shkollës universitare jopublike “Wisdom University”.
“Kjo është e para nismë në vendin tonë, për hapjen e një universiteti që ofron studimin në distancë me videokonferencë në sistem interaktiv me dy drejtime në kohë reale, me një staf pedagogjik të gjithin italian dhe me titujt profesorë, dhe në një universitet të akredituar ndërkombëtar (në BE), siç është San Pio V. Në këtë mënyrë, ne do t’u japim një mundësi të gjithë studentëve shqiptarë, që kanë aplikuar apo duan të aplikojnë në universitete të huaja që këtë mundësi mund ta shfrytëzojmë më së miri në Shqipëri. Në universitet ofrohen disa mundësi: e para, pas përfundimit të vitit të parë çdo student mund të vazhdojë studimet nëse dëshiron, në 10 filialet e këtij universiteti në Itali si dhe në çdo universitet tjetër të Italisë dhe BE-së. Dhe e dyta, pasi përfundon studimet tre vjeçare në këtë universitet, çdo student ka të drejtë në bazë të rezultateve dhe dëshirës të vazhdojë 2 vjet specialitetin Master dhe me mbarimin e studimit Master ka të drejtë të vazhdojë Doktoraturën edhe tre vite të tjera” thotë për Gazeta Shqiptare, Presidentja e Universitetit Brunilda Paskali.
Diploma
Pjesa më e madhe e studentëve shqiptarë që kanë përfunduar studimet jashtë vendit, në ndonjë vend evropian, harxhojnë energji të tëra për të bërë ekuivalentimin e diplomës në vendin tonë. Por edhe ata që e përfundojnë universitetin në Shqipëri, diploma e tyre nuk njihet jashtë vendit. Përfundimisht, me “S.PIO V” dhe “Wisdom University” me vendim te Keshillit te Ministrave te Shqiperise, diploma italiane njihet automatikisht, si në Shqipëri, ashtu edhe në vendet e tjera të BE, duke mos krijuar vështirësi për studentët.
Aplikimi
Që të aplikosh në universitetin e ri, duhet të dish gjuhën italiane shumë mirë, meqënëse pedagogët janë të gjithë italianë. Por edhe për ata që nuk dinë, “Wisdom University” kundrejt pagesës, ka hapur kurset e italishtes së përshpejtuar, në mënyrë që studentët të arrijnë të ndjekin edhe leksionet dhe seminaret në fakultet. Të gjithë studentët që do të studiojnë në Tirane do të kenë të njëjtat të drejta dhe detyrime si të gjithë studentët e Universitetit San Pio V në Itali.
Degët
Dy janë degët që do të aplikohen fillimisht në këtë universitet: Fakulteti i Shkencave politike me një program të plotë ku do të japë mësim edhe vetë ish ministri italian, profesor Rocco Buttiglione. Fakulteti ka si qëllim aftësimin e studentëve për lexim kritik të kontekstit aktual socio-politiko-ekonomik, si dhe njohje të mirë të strukturave themelore institucionale dhe juridike si në rrafshin italian, ashtu edhe atë ndërkombëtar. Përfshihet një formim ndërdisiplinor në sektorët juridikë, ekonomikë, politologji, social e historik me lende si: Organizimi dhe Administrimi publik, Analiza e politikave publike, Komunikimi publik dhe Institucional, Informatizimi i Administrates publike etj.
Ndërsa në Fakultetin e Ekonomisë propozohet një rrugë novatore ku studentët do të kenë marrë njohuri në më shumë se një fushë. Me një program të plotë, ku përfshihen Ekonomia e Ndërmarrjes, Teknikat e parashikimit Ekonomik, Institucione te se drejtes private, Shkencat e Administrimit, E drejta e Bashkimit Evropian etj, studentët do të arrijnë të kuptojnë dhe interpretojnë ndryshimin e qëndrueshëm të realitetit ekonomik e social të të gjitha tregjeve.

Pedagogët

Shkenca Politike
Buttiglione Rocco Filozofia Politike
Atella Vincenzo Politika Ekonomike
Augenti Antonio E drejta e BE
Biagini Antonello Historia e Evropës Lindore
Breschi Danilo Shkenca Politike
Cantoni Gianpiero Ekonomia Ndërkombëtare
Cuozzo Errico Historia e Institucioneve Politike
Durante Francesco E drejta Ndërkombëtare
Iodice Antonio Historia e Integrimit Evropian
Etj.

Fakulteti i Ekonomisë
Amoroso Marisa Marketing
Annibali Antonio Matematika për Shkencat ekonomike
Belvisi Pier Luigi Ekonomia politike I
Buccianti Cinzia Historia ekonomike
Cantoni Giampiero Ekonomia Ndërkombëtare
Di Marcello Vincenzo Informatika
Frau Aventino E drejta ndërkombëtare e Ekonomisë
Golinelli Gaetano Ekonomia dhe menaxhimi i sipërmarrjeve
Conte Giuseppe Institucione të së drejtës private
Etj

• 3900 Euro
  Studentëve u duhet të paguajnë 3900 euro për çdo vit shkollor, me tre këste në bankë nëse s’mund ta paguajnë njëherësh. Për çdo student shqiptar, në këtë mënyrë, do të hiqej kostoja e pagesës dhe e jetesës në Itali
  
• 60 euro
  Çdo student, sikurse edhe në Itali, do të duhet të paguajë taksën e regjistrimit, e cila në fakt paguhet edhe në universitetet shtetërore shqiptare. Kjo taksë 60 euro, paguhet vetëm një herë pa u përsëritur çdo vit
  
• 114 euro
  Meqënëse është Universitet italian, çdo student është i detyruar të paguajë edhe 114 euro taksën italiane të së drejtës për studim.
  Kjo taksë paguhet në fillim të vitit vetëm një herë
  
• 15 nëntor
  Brenda kësaj date do të kryhet regjistrimi dhe testimi për gjuhën italiane. Wisdom University, për ata që nuk kanë aftësi të mira gjuhe, kundrejt pagesës ofron edhe kurset e gjuhës italiane
  
• Telefonat
  Të gjithë personat që janë të interesuar për të studiuar në Universitetin Italian San Pio V duhet të telefonojnë në numrat e telefonit 04259311 dhe 04259312 për të regjistruar emrin e tyre pranë fakultetit që dëshirojnë