Mocioni ndaj Topallit nuk do të dorëzohet as brenda kësaj jave. Këtë e bëjnë të ditur zyrtarisht politikanët e opozitës të cilët po diskutojnë akoma për argumentat që duhet të paraqesin në mocion. Por sa më shumë kalon koha, aq më shumë zbehet edhe nisma e ndërmarrë nga opozita. Nënkryetari i PSD-së, Pajtim Bello ka sqaruar dje në një intervistë për “Gazeta Shqiptare”, 6 shkeljet që ka bërë kryeparlamentarja Jozefina Topalli, për të cilën, kjo parti ka marrë përsipër të iniciojë një mocion mosbesimi. Sipas Bellos, vendi është në një krizë të madhe institucionale dhe këtu ka një kontribut të “jashtëzakonshëm”, kryetarja e Kuvendit.
Flitet për një mocion mosbesimi për shkarkimin e Kryetares së Kuvendit. Përse merret kjo nismë nga PSD-ja dhe LSI-ja?
Kjo nismë buron nga dukuritë negative në ushtrimin e funksionit prej kryeparlamentares. Këto dukuri mund t’i grupojmë si të karakterit:të shkeljeve procedurale,të shkeljeve të rënda të Kushtetutës, të tejkalimit të kompetencave nga ana e kryetares, të delegjitimimit të veprimtarisë parlamentare,të vënies të Parlamentit nën diktatin e qeverisë dhe të PD-së, të etikës në komunikimin institucional
A mund të konkretizoni disa nga këto dukuri negative?
Për të mos u zgjatur, do të ndalem shkurtimisht në disa prej tyre. Së pari, në rreth një vit jetë parlamentare janë raste të dukshme të shkeljeve kushtetuese; janë një numër ligjesh, që edhe pse opozita ka kundërshtuar aprovimin e tyre nga Parlamenti, maxhoranca i ka kaluar dhe më tej këto ligje janë kthyer nga Presidenti për rishqyrtim, apo janë atakuar nga Gjykata Kushtetuese. Po në këtë aspekt duhen parë rastet kur u hoq imuniteti i deputetëve, apo kur u iniciua “lufta” kundër nepotizmit, heqja e votimit të fshehtë në Parlament, etj.
Së dyti: Të gjithëve na kujtohet 28 korriku, kur Kryetarja e Kuvendit e mblodhi Parlamentin jashtë godinës së tij. Në një shtet demokratik, ky veprim quhet grusht shteti! Së treti: Komunikimi me institucionin e Presidentit dhe të Prokurorit të Përgjithshëm, ka nxirë çdo fije të etikës në komunikim. Mirë që me kryeprokurorin nuk e ka honepsur që në nisje, por me Presidentin ç’ka?! Të fyesh rëndë Presidentin e Republikës, ta akuzosh atë si të kapur nga kupola e krimit etj, nuk është thjesht çështje etike në komunikim. Etika është për rangjet më poshtë, kurse në nivele të tilla kemi të bëjmë me një konflikt institucional të pastër dhe me pasoja të rënda për vendin dhe për të gjithë shqiptarët.
Pra, ju mendoni se kemi të bëjmë me një krizë institucionale?!
Pa dyshim. Është një krizë institucionale e kompletuar dhe në këtë çështje, kontributi i kryeparlamentares është i “jashtëzakonshëm”; kuptohet se me këtë kontribut lidhet edhe përgjegjësia e saj.
Por a mendoni ju se mund të kini sukses me mocionin e mosbesimit?
Natyrisht që duhet llogaritur suksesi për një nismë të tillë. Por shikoni çfarë ndodh?! Veprimtaria e Kuvendit gati është ndërprerë. Nuk ka seancë që të mos degjenerojë në sharje dhe sherre të nxitura nga maxhoranca, nën përkrahjen e vetë kryeparlamentares. Në këto kushte të tilla, shumë deputetë do të reflektojnë, nëse do të dëshirojnë të zhbllokojnë jo vetëm veprimtarinë parlamentare, por edhe t’i japin fund krizës institucionale! Në një demokraci normale, mbas sulmit të paprinciptë ndaj Presidentit të Republikës, në vend të një tërheqjeje apo ngrirjeje taktike të debatit, kryeparlamentarja duhet të kishte dhënë dorëheqjen e parevokueshme.

Shkeljet e Topallit,
sipas opozitës
1. Shkelje procedurale gjatë zhvillimit të seancave
2. Shkelje të rënda të Kushtetutës përgjatë gjithë këtij viti
3. Tejkalim i kompetencave nga ana e kryetares së Kuvendit gjatë zhvillimit të seancave dhe në jetën parlamentare
4. Delegjitimim i veprimtarisë parlamentare, ku nuk ka asnjë seancë që të zhvillohet në mënyrë normale
5. Vënie e Parlamentit nën diktatin e qeverisë dhe të PD-së
6. Shkelje e etikës në komunikimin institucional e shfaqur më së fundit në punimet e kuvendit