Opozita kërkon që në zgjedhjet e ardhshme vendore të votohet me një çertifikatë të veçantë, me ngjyrë të verdhë dhe me kode sigurie. Propozimi i bërë nga socialistët në mbledhjen e djeshme të Komisionit të Reformës zgjedhore, vjen pas denoncimit të tyre se në treg tashmë janë shpërndarë 1.4 milionë certifikata të cilat janë skarco. Ky propozim, së bashku me një paketë të tërë ndryshimesh në kodin zgjedhor dhe në kushtetutë, u paraqitën dje në mbledhjen e komisionit, por për to, nuk pati asnjë përgjigje nga ana e deputetëve të maxhorancës. Ata u shprehën se nuk mund të shkojnë të gjitha propozimet në bllok, në parlament.
Një nga propozimet më interesante ka të bëjë me shtimin e numrit të anëtarëve të KZZ nga 7 në 11 anëtarë, duke kërkuar përfshirjen edhe të LSI (Ilir Meta), PDK (Nard Ndoka), PAA (Lufter Xhuveli) dhe PDS (Paskal Milo). Shtimi i këtyre anëtarëve do të thotë shumë për opozitën aktuale, sepse pavarësisht faktit se Xhuveli deklarohet me të djathtën, shpresohet shumë që njerëzit që zgjidhen në bazë nga PAA i përkasin të majtës, dhe në shumë zona, opozita mund të bëjë edhe maxhorancën. Pritet reagimi i PD për këtë propozim.
Propozimet
Opozita propozon në draftin e saj që Kushtetuta të ndryshohet në 4 nene për reformën zgjedhore. Sipas të majtëve, në ligjin themeltar nuk duhet të ndërhyhet vetëm për zgjatjen e mandatit të të zgjedhurve të pushtetit lokal dhe shtimin e anëtarëve të KQZ, por edhe për ndryshimin e sistemit zgjedhor, përcaktimin e afateve dhe kohën e zhvillimit të zgjedhjeve. Opozita kërkon të ketë ndikim edhe në KZZ (Komisionet Zonale Zgjedhore). Në projekt kërkohet që vendime të tilla, si shpallja e rezultatit të votimit për listat shumë emërore për Kuvendin, kërkesat për deklarimin e pavlefshëm të zgjedhjeve, emërimet apo shkarkimet e anëtarëve të komisioneve të qendrave të votimit, të merren me shumicën e të paktën 6 anëtarëve, nga 9 që ka komisioni. Masa shtrënguese, ekspertët e opozitës kanë përcaktuar edhe për ditën e votimit. Sipas tyre, në Kodin Zgjedhor duhet përcaktuar që dy anëtarë të KZZ, një i majtë e një i djathtë, të kontrollojnë duart e zgjedhësve për të mos lejuar që të votojnë dy herë. Në projekt kërkohet që numri i anëtarëve të KZZ të jetë 11 nga 7 që është aktualisht, në mënyrë që të përfaqësohen më shumë parti politike, sipas formulës 2 anëtarë propozohen nga partitë e mëdha politike PD-PS më pas katër nga partitë e vogla në maxhorancë dhe katër nga partitë në opozitë. Aktualisht në komisione përfaqësohen me anëtarë PD-ja, PS-ja, PR-ja, PDR-ja, PSD-ja dhe PAD-ja, ndërkohë që sugjerohet të shtohen LSI-ja, PDS-ja, PDK-ja dhe PAA-ja.

Ndryshimet
Kushtetuta duhet të ndryshojë për sistemin zgjedhor, zgjatjen deri në 4 vjet të të zgjedhurve lokalë, shtimin
nga 7 në 9 të anëtarëve të Komisionit Qendror të Zgjedhjeve dhe përcaktimin e afateve dhe kohën e zgjedhjeve.

Certifikatat
Për votim zgjedhësi duhet të ketë një dokument identiteti: certifikatë lindjeje me fotografi, e lëshuar posaçërisht për zgjedhjet, me element sigurie me ngjyrë të verdhë dhe e vulosur me një vulë të veçantë për zgjedhje, letërnjoftim ose pasaportë.

Votimi në KQZ
Miratohen kur votojnë pro jo më pak se 6 anëtarë të KQZ-së, vendimet për: Shpalljen e rezultatit të votimit për listat shumë emërore për Kuvendin, ankimet kundër vendimeve të KZZ-ve dhe KZQ-ve për rezultatin e zgjedhjeve, kërkesat për deklarimin e pavlefshëm të zgjedhjeve.

Anëtarët
Komisionet Zonale Zgjedhore përbëhen nga 11 anëtarë (7 kanë aktualisht) dhe sekretari. Një anëtar propozohet nga PD-ja një nga PS-ja dhe katër anëtarë nga partitë e maxhorancës e katër nga partitë e vogla të opozitës. Edhe për Komisionet Zonale të Qendrave të Votimit, vlen e njëjta formulë.

Shtimi
Rritja e numrit të anëtarëve të KQZ-së bëhet me propozim të Partisë Lëvizja Socialiste për Integrim dhe Demokristiane. Nga 9 anëtar të KQZ-së, katër prej tyre zgjidhen nga Kuvendi. Dy anëtarë propozohen nga partia e dytë dhe e tretë e spektrit të djathtë dhe dy anëtarë nga partia e dytë edhe e tretë e spektrit të majtë.

Bllokimi i reformës
Partitë politike e kanë të pamundur të bien dakord për reformën zgjedhore. Sërish dje mbledhja e komisionit dështoi, pasi partitë e opozitës kërkuan që e tërë marrëveshja e 30 gushtit të votohet në bllok në Kuvend, ndërsa PD-ja, që të votohen amendamentet e parë që janë gati dhe më pas ndryshimet e tjera.

Akuzat e PS
Bashkëkryetari socialist, Ben Blushi akuzoi dje maxhorancën se nuk ka vullnet për të vijuar punën me reformën. Sipas tij, qeveria nuk ka sjellë asnjë amendament për ndryshimin e Kodit Zgjedhor dhe duhet të bindet se nuk mund të ketë zgjedhje pa rregulla loje të zhvilluara bashkërisht. Ndërsa opozita ka dorëzuar një projekt.

Afati i Komisionit
Komisioni për reformën zgjedhore ka afat deri në 31 tetor për të bërë të gjitha ndryshimet në Kodin Zgjedhor, duke zbatuar dhe rekomandimet e OSBE/ODIHR-it. Kjo është e disata herë që partitë shtyjnë afatet dhe nuk bëjnë ndryshime. Më e fundit ishte 15 tetori, kur partitë duhet të kishin gati projektin.