Kryetari i PDK-së, Ndoka dhe kryetari i LSI-së, Ilir Meta, zhvilluan dje një takim në selinë e PDK-së, ku u diskutua mbi reformën elektorale dhe situatën politike në vend. “Pakt Mirësjelljeje” për zgjedhjet vendore, i cili ka si qëllim që kandidatët e PDK-së dhe të LSI-së të eliminojnë akuzat pa bazë, fyerjet dhe sharjet personale gjatë fushatës elektorale dhe t’u japin hapësira alternativave”, ishte shpjegimi i Nard Ndokës pas takimit me kryetarin e LSI-së, Meta. Duke komentuar situatën politike në vend, Ndoka u shpreh se vihet re një mungesë vetëpërmbajtjeje dhe se jeta parlamentare është në nivel të ulët etik dhe administrativ. Kryetari i Lëvizjes Socialiste për Integrim, Ilir Meta, tha pas takimit se “LSI do të bashkëpunojë me PDK-në dhe me çdo forcë tjetër, pavarësisht nga ngjyrimet politike dhe specifikat e tyre, për reformën zgjedhore dhe për çështje të rëndësishme që kanë të bëjnë me fatet e vendit”. Kreu i LSI-së, Ilir Meta, u shpreh se “takimi i sotëm u nxit nga dëshira dhe vullneti për të kontribuar për rikthimin e normalitetit në jetën politike, institucionale dhe parlamentare në vend”. “Klima shumë e tensionuar, e cila prej kohësh reflektohet në Parlament, e zhvendos debatin politik nga çështjet e integrimit evropian, në çështjet tradicionale dhe të prapambetura në raport me standardet, siç janë ato të zgjedhjeve dhe reformës zgjedhore”, u shpreh Meta. Kreu i LSI-së dha alarmin se bllokimi i reformës zgjedhore vë në rrezik integritetin e zgjedhjeve vendore. “Bllokimi i komisionit të reformës zgjedhore është një shqetësim shumë i madh, që vë në rrezik të plotë integritetin e zgjedhjeve të ardhshme vendore, ndaj dhe ne apelojmë që ky komision urgjentisht të përmbushë misionin e tij, të realizojë marrëveshjen e gushtit, por njëkohësisht të përmbushë të gjitha rekomandimet e OSBE/ODIHR-it për procesin zgjedhor”, tha Meta. Kreu i LSI-së e ka konsideruar të rëndësishëm bashkëpunimin me PDK-në si një forcë tashmë shumë e rëndësishme në Parlament, por edhe me forca të tjera politike, pavarësisht nga ngjyrimet politike dhe specifikat e tyre për çdo çështje të rëndësishme të vendit, duke përcaktuar përmasat e këtij bashkëpunimi. ”Nuk do të bashkëpunojmë për çdo gjë, por për ato çështje që janë të rëndësishme për stabilitetin e vendit dhe vendosjen e atyre rregullave të lojës politike që për fat të keq mungojnë sot”, u shpreh Meta.

Aleanca e majtë dhe e djathtë

Mund të jetë dukur si një "çudi" politike realizimi i një pakti politik ndërmjet dy partive që janë të një spektri të kundërt politik. PDK-ja e Ndokës është në koalicionin qeverisës së të djathtës, ndërsa LSI-ja ndodhet në kampin e opozitës, e bashkuar me partitë e majta. Një marrëveshje e tillë mund t’u shkaktojë jo pak "telashe" dy partive të mëdha politike, PS dhe PD, të cilave një pakt i tillë mund t’u sjellë dhe ndonjë pakënaqësi me aleatët e tyre LSI dhe PDK.