Hernan Krespo ka disa ndeshje që s'luan me Interin, për shkak të një dëmtimi, por nesër shpreson që Mançini ta grumbullojë për sfidën e Championsit ndaj Spartakut të Moskës. Në moshën 31-vjeçare, ëndrrat në "sirtar" të argjentinasit janë të shumta. "Po, - pranon ai, - sepse si në jetë, ashtu edhe në futboll, duhet të kesh objektiva të rinj. Ajo që nuk është bërë, nuk mjafton asnjëherë. Ndaj, tani dua të fitoj me Interin, duke parë që gjatë përvojës sime të parë zikaltër, që mund të konsiderohet pozitive, nuk ia arrita. Siç e kam thënë, një "tren" si ai i Interit është shumë i vështirë të kalojë dy herë në karrierën e një futbollisti. Unë jam një rast i veçantë, ose një futbollist me shumë fat që kam pasur rastin për herë të dytë të luaj tek Interi, ndaj dua të jap ndihmën time për të fituar gjithçka. Shumë njerëz thonë se kam një "llogari" të hapur me Championsin, është e vërtetë, por theksoj se "llogarinë" duhet ta ruaj edhe për kampionatin, prandaj nuk zgjedh. Rëndësi ka të fitoj me Interin."
Pas pak javësh (28 tetor) është derbi me Milanin dhe tifozët kuqezinj nuk dihet se çfarë pritjeje do t'i bëjnë ish-milanistit: "Besoj mirë, - uron Krespo. - Nuk kam pasur asnjëherë probleme me tifozët e ish-skuadrave të mia, sepse të gjithë e dinë që në fushë jap gjithnjë maksimumin, ndaj kam fituar respektin e njerëzve me punën dhe djersën time." Në fund, kapitulli Adriano. Krespo shton: "Mua më duket i qetë, e shoh mirë. Ndoshta si të gjithë duhet të gjejë ende formën e duhur, por nuk më duket se ka të gjitha problemet, për të cilat flitet në gazeta e televizione. Është i fortë, i ri, luan tek Interi dhe në kombëtaren braziliane, ka kohë të përmirësohet, pra është në kushte ideale për të qenë një protagonist i një karriere të rëndësishme."

Mançini llogarit edhe Hernanin ndaj Spartakut
Shpresat që Roberto Mançini të grumbullojë Hernan Krespon për sfidën e nesërme për Ligën e Kampioneve ndaj Spartakut të Moskës, janë shtuar orët e fundit. Pezullimi i Ibrahimoviçit, forma e dobët e Adrianos dhe rikthimi i Kruzit dhe Rekobës nga dëmtimet, nuk e sigurojnë trajnerin zikaltër të ketë një rendiment të lartë në sulm nesër ndaj rusëve. Ndonëse mjekët e skuadrës nuk e kanë thënë ende fjalën e tyre të fundit, Mançini siguron: "Nuk do të jetë Ibra, por besoj se do të kemi Krespon. Është stërvitur me grupin të shtunën, të shohim në orët e ardhshme, por besoj se do t'ia dalë. Pastaj do të riaftësojmë Vieiranë, që për ne është shumë i rëndësishëm. Kambiaso? Shpresoj ta aktivizoj në fund të muajit." Mançini ka dashur të sqarojë edhe një herë tjetër deklaratat mbi Rekobën: "Fjalët e mia ishin dhe janë plot mirëkuptim dhe respekt për një talent të madh."