POGRADEC - Katër banorë të fshatit Memlisht në rrethin e Pogradecit kanë dëmtuar linjën dytësore të hekurudhës, me synimin që të vidhnin shinat për material ndërtimi. Policia e Rendit, e lajmëruar nga banorë të fshatit Pojskë, ka mundur të mbërrijë në vendngjarje në kohën që ata po përpiqeshin t’i ngarkonin shinat në një mjet. Uniformat blu mundën të arrestojnë në flagrancë vetëm dy prej tyre, ndërsa dy të tjerët janë shpallur në kërkim. Ngjarja ka ndodhur në mesnatë, duke u gdhirë dita e diel, kur në afërsi të fshatit Pojskë tek linja dytësore e hekurudhës vjedhësit nga Memlishti me vare’ dhe qysqi kishin punuar për orë të tëra për çmontimin e shinave të hekurudhës. Ata kishin mundur të nxirrnin katër të tilla, duke hapur “front pune” për vjedhje të tjera në netët që do të vinin. Zhurma që bënë kishte zgjuar banorët aty pranë, të cilët rreth orës 02:00 pas mesnate kanë informuar në komisariatin e policisë në Pogradec. Grupi i gatshëm ka mbërritur pikërisht në momentin që shinat ishin duke u ngarkuar. Në moment janë arrestuar 30-vjeçari Jetnor Guçi dhe adoleshenti 15-vjeçar I.Z. Duke përfituar nga errësira e natës, dy vjedhësit e tjerë kanë mundur të largohen, duke i shpëtuar arrestimit të policisë. Gjatë hetimeve të para policia identifikoi edhe dy vjedhësit e tjerë. Ata janë Paqësor Palla dhe Edi Pambuku, të shpallur në kërkim.