Trajneri i Francës, Rajmond Domenek, ka deklaruar se Ludovik Zhyli ka ende një të ardhme që e pret në skuadrën përfaqësuese franceze, edhe pse nuk e ka thirrur lojtarin e Barcelonës prej një viti. Zhyli ka zhvilluar ndeshjen e fundit, të 17-n, më 12 tetor të 2005-s, kur shënoi golin në ndeshjen paraeliminatore të botërorit ndaj Qipros. Përveç se ka fituar titullin kampion të Spanjës dhe Ligën e Kampioneve, Domeneku vazhdon ta lërë jashtë skuadrës. "Kam disa zgjedhje për të bërë. Nuk është se kam ndonjë inat me të, - tha Domeneku gjatë një "show" sportiv në Francë. - Zhyli ka cilësi mjaft të mira, ai luan për Barcelonën. Nëse vazhdon kështu, mbase një ditë do të na duhet". Megjithatë, Domeneku i ka kërkuar Zhylisë të mos "qahet" shumë në intervistat që jep për mediat.
"Të vazhdojë të luajë mirë... dhe ta mbajë gojën të mbyllur për pak kohë", - tha Domeneku. Zhyli mendon se mosgrumbullimi i tij ka lidhje me shenjën e horoskopit. Domeneku njihet për supersticiozitetin e tij dhe kriteret që vendos kur grumbullon lojtarët. Domeneku thotë se stili sulmues i Barcelonës nuk përputhet me taktikat që përdor Franca. "Ai luan me një sistem te Barcelona, i cili nuk përputhet shumë me taktikat që ne përdorim, -tha Domeneku. - Këtu nuk po flasim për cilësitë, por them se ai nuk më duhet për momentin".