Kryeministri Sali Berisha nuk e ka lënë zyrën e tij edhe pse dje, ka patur ditëlindjen apo edhe pse i ka qëlluar të jetë ditë e dielë. Me rastin e 62 vjetorit të tij ai ka marrë urime nga një grup studentësh, përfaqësues nga universitet e Shqipërisë, Kosovës, Maqedonisë dhe të studentëve shqiptarë që studiojnë në universitetet perendimore. Me disa buqeta me lule, studentët kanë uruar kryeministrin ashtu sicc ka bërë edhe stafi i tij i punës, që dje janë ndodhur sërish në zyrë pranë shefit të tyre. Ndërsa dreka dhe mbrëmja e ditëlindjes së kryeministrit ka kaluar me familjarët. Sipas njoftimit zyrtar të Kryeministrisë, bashkë me urimet, studentët shprehën kënaqësinë që uronin jo vetëm kryeministrin, por edhe profesorin e përkushtuar të mjekësisë, që pjesën më të madhe të jetës së tij ua ka përkushtuar dijes, mësimit dhe brezit të ri. Ndër të tjera, studentët u shprehën se me urimet e tyre bashkohen "mijëra të rinj aspirantë të ideve të lirisë dhe ekonomisë së tregut për t'ju uruar që të vazhdoni me gjithë energjitë dhe forcën që ju karakterizon kontributin tuaj në emër të zhvillimit. Si qytetarë të Shqipërisë, ju urojmë jetë të gjatë për të na drejtuar drejt ëndrrës së gjithë shqiptarëve, drejt të ardhmes europiane." Nga ana e tij Kryeministri falënderoi përzemërsisht studentët për urimet e tyre të sinqerta, duke i siguruar se në axhendën e qeverisë të rinjtë dhe studentët kanë një përparësi reale. Ne po punojmë, u shpreh Kryeministri, që në buxhetin e këtij viti të bëjmë një rritje të ndjeshme për universitetet. Më tej, ai theksoi se "së pari bëmë hapjen e pranimeve në universitete që ishte hap shumë i domosdoshëm. Tani duhet të punojmë për të ndryshuar kushtet në universitete. Do ndërtohen godina të reja, do të përmirësohen kushtet e jetesës, do të modernizohet qyteti Studenti. Ndërkohë që do të fillojë ndërtimi i një kampusi për auditore, për klasa, në zonat e ndërtimeve universitare, si dhe do të vazhdojmë të bëjmë çdo përpjekje për të çliruar ambjentet e shkollave nga ndërtesat, në mirëkuptim me qytetarët". Me rastin e ditëlindjes, Kryeministrin Berisha e uroi gjithashtu edhe stafi i tij i ngushtë. Kryeministri u shprehu bashkëpunëtoëve të tij falenderimet e përzemërta për ndihmën dhe punën e tyre të përkushtuar në këtë vit të parë të qeverisjes, duke theksuar se arritjet e deritanishme të qeverisë kanë edhe kontributin e tyre të çmuar.