Pas 13 vitesh Anjelët do të investojnë sërish te Juventusi. Koha e vetëfinancimit dhe e nëndarjeve ka mbaruar. Rënia nga kategoria, së bashku me atë të imazhit, ka shkaktuar një dëm ekonomik të cilin klubi e ka përllogaritur rreth 130 milionë euro. Bilanci i fundit sapo është mbyllur me 36,5 milionë euro humbje. Skuadra ka humbur shumë kampionë dhe ata që kanë mbetur i rëndojnë shumë bilancit me pagat e tyre me shtatë shifra, të cilata janë të pazakonta për Serinë B. Do të duhen para, shumë para, për të ndërtuar sërish një organikë të nivelit europian. Por sponsori kryesor, Tamoili, e ka prishur kontratën të cilën tani po e rinegocion dhe së bashku me të do të rishikohen edhe disa kontrata të tjera, gjithnjë me synimin që të ulen çmimet. Zhan Klod Blanku duhet t'i marrë në konsideratë këto rrethana negative në ribërjen e planit industrial të cilin do ta paraqesë brenda fundit të vitit. Plani, që ndahet në tre kapituj (sportiv, komercial, imobiliar), ka për qëllim ta rikthejë brenda pesë vitesh Juventusin atje ku ishte përpara se të binte: një skuadër e cila të konkurrojë çdo vit për Championsin dhe një klub i shëndoshë që të mbahet vetë duke prodhuar përfitime.
Në projektin e Blankut aspekti i dytë, dhe për rrjehdojë ehde i pari, është i lidhur me shfrytëzimin e stadiumit. Por nuk është e sigurt se me 20 milionë eurot, të diskutuara në takimin e fundit me autoritetet e Torinos se, Juventusi mund ta shndërrojë Dele Alpin në impiantin që mendon, një strukturë më e gjerë në gjendje të bëjë para me veprimtaritë tregtare të vendosura përreth saj. Plani industrial është më ambicioz dhe kërkon më shumë investime. Edhe në nivelin sportiv, sepse skuadra mbetet qendra e gjithçkaje. "Ne do të bëjmë të ditur se për çfarë kemi nevojë, - tha administratori i deleguar, - pas së cilës do të shohim se si mund t'i plotësojmë këto nevoja. Ka shumë mënyra, përveç investimeve nga ana e pronarëve, të cilët, sikurse të gjithë, e duan sërish Juven në majat më të larta."