Roberto Karlos i ka dhënë lamtumirën skuadrës përfaqësuese, për t'u përqendruar më shumë te Reali i Madridit. Sipas tij: "Jam më i freskët dhe gjithmonë në dispozicion të Kapelos. Vjen një etapë e karrierës ku duhet të mësosh të heqësh dorë nga disa gjëra që më parë kanë qenë prioritare." Sot, mbrojtësi i majtë do të jetë pjesë e formacionit që do të sfidojë Gefaten. "Merengesit" këto ditë kanë punuar me një variant të ri taktik, në mënyrë që Ronaldo dhe Van Nistëlroi të luajnë së bashku. Roberto Karlos nuk përjashton as mundësinë Kasano: "Kapelo po e mendon, por nuk e dimë ende si do të luajmë. Ronaldo po stërvitet mirë dhe ne kemi nevojë për të, por është edhe Kasano. Roni mund të luajë me Van Nistëlroin, por edhe Kasano ka treguar përshtatshmërinë e tij." Më pas vazhdon komenti për bashkatdhetarin e tij. Dhjetë vjet më parë, kur luante me Barcelonën, Ronaldo shënoi një gol të paharrueshëm ndaj Kompostelës, ku dribloi gjysmën e ekipit kundërshtar duke u nisur nga mesfusha: "Eshtë një nga golat më të bukur që Ronaldo ka shënuar gjatë karrierës së tij dhe unë shpresoj të shënojë edhe të tjerë si ai. Roni e meriton, sepse po punon shumë për t'u rikthyer numri 1. Do të ketë të tjera ditë speciale për të." Roberto Karlos "projektohet" drejt sfidës së javës së ardhshme, ku Reali do të presë Barcelonën: "Barcelona ka futbollistë që kanë luajtur me kombëtaren dhe më pas do të luajnë ndaj Seviljes dhe Çelsit dy ndeshje shumë të vëshira. Kësisoj, shpresoj që të jenë disi të lodhur karshi nesh, por mbi të gjitha pres një ndeshje shumë të luftuar." Por përpara Barcelonës është Getafe, sot në ndeshjen që hap javën e gjashtë të kampionatit spanjoll: "Në dy vitet e fundit nuk kemi fituar në Getafe dhe shpresoj që këtë herë gjërat të ndryshojnë. Do të jetë një përballje e vështirë dhe duhet të ruajmë përqendrimin, duke hequr nga mendja ndeshjen e së martës me Steauan e Bukureshtit." Në fund të deklaratës së tij, 34-vjeçari komentoi kritikat e bëra ndaj "merengesve" në javët e para të sezonit. "Kritikat ndonjëherë janë të dobishme, pasi nxjerrin në pah defektet. Aktualisht po luajmë mirë në aspektin mbrojtës. Ndeshje pas ndeshjeje studiojmë kasetat dhe bisedojmë me trajnerin gjërat që duhet të përmirësojmë. E rëndësishme është që jemi në udhë të mbarë."