Kur në vitin 2002 do të vendoste mbi krye kurorën e “Miss Shqipëria 2002”, Zaimina Vasjari kishte dy ëndrra për të ardhmen: të vazhdonte studimet për arkitekturë dhe të hynte në botën e muzikës. Dhe me sa duket fati u tregua shumë bujar me bukuroshen, që në atë kohë ishte vetëm 15 vjeçe. Ajo sot është studente në vitin e dytë, dega Arkitekturë, në një prej universiteteve private të kryeqytetit, ndërkohë që ka arritur të lançohet edhe në botën e muzikës. Por në fakt përveç spektakleve të bukurisë, muzikës dhe pamjes ekstravagante, Zaimina Vasjari është përfolur në faqet rozë të shtypit edhe për jetën e saj private, paratë e shumta që shpenzon për makina luksoze dhe së fundi për prishjen e kontratës me kompaninë e vajit “Fiol”, për shkak të disa fotove ku bukuroshja kishte pozuar e zhveshur. Por cila është e vërteta?

Ke qenë një prej konkurrenteve në festivalin “Mikrofoni i artë” dhe pikërisht me muzikën do doja të fillonim. Si u ndjeve në këtë aktivitet ishte një lloj stimuli për ty apo prisje më shumë?
Thjesht ishte pjesëmarrja ime e parë në një aktivitet muzikor. Nëse do të kisha marrë një çmim, sigurisht që do të kishte qenë shumë stimuluese, megjithatë ajo që ka rëndësi për mua është performanca e arrirë, çka ishte edhe qëllimi kryesor i këtij prezantimi.

Mendon që do të vazhdosh në botën e muzikës apo është thjesht një qëndrim kalimtar për ty?
Për momentin mendoj se do të vazhdoj, më pas të shohim.

Cila është arsyeja që ke zgjedhur të këndosh, ndërkohë që studion për arkitekturë?
Në momentin që kam dalë miss në vitin 2002, kur më kanë pyetur në lidhje me ëndrrat e mia të së ardhmes, jam shprehur se ishin dy: të bëhesha arkitekte dhe të këndoja. Ndoshta ata që e kanë dëgjuar atëherë mund t’i kenë parë thjesht si dëshira të një 15-vjeçareje, por për mua kanë qenë të rëndësishme dhe të përcaktuara mirë. Arkitektura është një rrugë së cilës i kam hyrë dhe do të jetë profesioni im, ndërsa kënga është një ëndërr tashmë e realizuar.

Përgjithësisht në videoklipet e tua shihet një lloj ekstravagance, një lloj joshjeje femërore, që deri diku mund të jetë konsideruar e ekzagjeruar. Cila është arsyeja që Zai bën zgjedhje të tilla?
Ky është stili im. Unë si natyrë anoj nga stili ekstravagant. Po të shohësh edhe veshjet e mia të përditshme janë ekstravagante për syrin e zakonshëm. Për këtë arsye edhe në videoklip kam dashur të jem vetvetja. Eshtë e vërtetë që në videoklip imazhi është më i ekzagjeruar, sepse bëhet fjalë për një imazh artistik dhe në këtë aspekt unë nuk e kam problem për t’u zhveshur. Videoklipi është tjetër gjë nga pamja e përditshme, ku je disi më e kufizuar.

Deri në ç’pikë nuk e ke problem të zhvishesh?
Personalisht nudoja artistike më pëlqen shumë, madje kam menduar që shumë shpejt të realizoj diçka tepër të bukur në këtë drejtim, që sigurisht do të jetë nudo, sepse i adhuroj. Megjithatë për momentin dua të mbetet sekret si ide.

Druhesh mos ta vjedh ndokush?
Gjë që ndodh këtu tek ne.

Meqë të pëlqen nudoja, ti vetë ke pozuar ndonjëherë?
Vetëm gjysmë e zhveshur. Toples dmth.

Të shqetëson fakti që nga të tjerët mund të përflitesh në këtë drejtim?
Absolutisht jo. Përderisa unë ndjehem mirë me veten kur zhvishem, nuk më bezdisin sytë e të tjerëve që më shikojnë, ky fakt nuk ka se si të ndikojë tek unë.

Po në familjen tënde si është pritur Zaimina dhe ekstravaganca e saj?
U bënë tashmë gati 4 vjet që kam hyrë në botën e spektaklit. Në fillimet e para babi i ka pasur problem këto gjërat e mia, por me kalimin e kohës ndoshta u mësua edhe me natyrën time, që Zaimina do të bëjë atë që mendon vetë.

Mendon se mënyra me të cilën një këngëtare zbulon hiret e saj në një videoklip ndikon në suksesin e këngës?
Sigurisht. Kjo taktikë funksionon në të gjithë botën. Kot të themi që është vetëm zëri. Te femra ka rëndësi edhe mënyra se si ajo serviret. Veshjet ekstravagante apo nudoja femërore janë gjëra komerciale që funksionojnë tek videoklipet në të gjithë botën.

Ke dëgjuar thashetheme për veten tënde dhe si reagon ndaj tyre?
Kam dëgjuar dhe kam lexuar shumë. Kam dashur të përgënjeshtroj gjëra që nuk kanë qenë të vërteta, por duke menduar se ato kanë të bëjnë me jetën time private kam vendosur të hesht në këtë drejtim.

Të shqetësojnë ato që thuhen për ty?
Nëse këto gjëra thuhen dhe shkruhen nga gazetarë më shqetësojnë, sepse një shkrim influencon tek lexuesi dhe është apo nuk është i vërtetë në momentin që publikohet, kjo ka pak rëndësi. Pasi lexuesi bazohet tek ajo që lexon dhe nuk lodhet më tej për të kërkuar të vërtetën.

Më the që nuk dëshiron të flasësh për jetën tënde private...
Po, sepse kam folur dikur, kur kam qenë edhe më e vogël, por fjalët e mia janë shprehur dhe janë shkruar ndryshe nga gazetarët. Kjo më ka lënduar, njëkohësisht edhe familjen time, ndaj kam vendosur që jetën time private ta lë jashtë intervistave.

Nuk mund të na thuash nëse je e dashuruar?
Zaimina është shumë e dashuruar, por për sa i përket personit dhe detajeve të tjera për dashurinë time, nuk dua të them asgjë. Dua të mbeten private.

Je vetëm 19 vjeçe. Gjithmonë e veshur, e mbajtur mirë, ke një veturë luksoze. Si arrin t’i sigurosh të ardhurat?
Më vjen mirë që dole tek kjo pyetje. Sepse shumë kam lexuar në këtë drejtim, ndaj dua të them se Zaimina ka një familje, që deri tani e ka mbështetur në të gjitha drejtimet, financiarisht. Gjithashtu Zaimina këto 4 vjet, përveç mbështetjes së madhe që ka marrë nga familja, shumë shpenzime ka arritur t’i përballojë edhe vetë, duke filluar që nga kontrata që kam pasur me vajin “Fiol”, ku merrja një rrogë që për një moshatare të moshës sime ishte e paimagjinueshme e për të vazhduar në koncerte apo aktivitete artistike, që gjithashtu shpërblehen financiarisht.

Le t’i kthehemi pak shkollës. Fakti që je një vajzë e ekranit të ndihmon në marrëdhënie me pedagogët?
Po, më ka ndihmuar. Dega që unë kam zgjedhur kërkon shumë impenjim dhe duke qenë se unë merrem edhe me spektaklin, ka pasur raste kur mund ta kem lënë shkollën pak pas dore. Për këtë arsye për disa mungesa ose orë të humbura, pedagogët më kanë toleruar.

Po në shoqëri, si është Zaimina?
Më pëlqen shoqëria. Jam tip i mjaft i komunikueshëm, tepër e dashur, megjithatë miqtë e mi janë shumë pak.

Janë artistë apo njerëz jashtë artit?
Jashtë artit. Tek artistët gjen xhelozira mes njëri-tjetrit, ndonëse pohojnë të kundërtën, kështu që kur kam miq të vërtetë nuk kam pse i kërkoj në art.

Të kam parë gjithmonë të shoqëruar me motrën tënde, edhe ajo është mikesha jote?
Po, sigurisht.

Në të ardhmen vazhdon ta shohësh veten si vajzë spektakli, apo ai arkitekte?
Arkitekturën e mendoj si profesionin tim në të ardhmen, kurse aktivitetet e tjera do të jenë në plan të dytë.

te dhenat

• Emri: Zaimina
  
• Mbiemri: Vasjari
  
• Ditëlindja: 17.6.1987
  
• Gjatësia: 172 cm
  
• Studimet: Arkitekturë
  
• Çmimet: “Miss Shqipëria 2002”

Në gjyq me kompaninë e vajit “Fiol”
Për një kohë të gjatë Zaimina Vasjari ka qenë imazhi i vajit “Fiol”. Por do të vinte një ditë, që kontrata e nënshkruar do të zgjidhej përpara kohe nga kompania dhe në vend të Zaiminës do të prezantohej një vajzë tjetër. U përfol se shkak i largimit të Zait u bënë disa foto, në të cilat imazhi i “Fiol”, Zai, kishte pozuar e zhveshur, duke e dëmtuar kompaninë në këtë mënyrë. Por, sipas vetë Zaimina Vasjarit, e vërteta është krejt ndryshe dhe ndonëse nuk dëshiron të japë detaje në lidhje me këtë fakt, pohon se e ka hedhur në gjyq kompaninë “Fiol” për prishjen e kontratës dhe procesi vazhdon.

Pasioni për makinat dhe shpejtësinë
“Zaimina është e çmendur pas shpejtësisë”. Këtë element rebel të jetës së Zait na e tregon motra e saj më e madhe, Beliola, që e shoqëron kudo, madje edhe në koncerte e intervista. Dhe jo vetëm kaq, por Zai nuk del kurrë nga shtëpia pa makinën e saj, të cilën e konsideron si mjetin më të domosdoshëm të jetës. I pëlqen të ecë me shpejtësi, ndaj kjo është edhe arsyeja që gjithmonë ka synuar makinat me benzinë e që ecin shpejt, ndonëse prindërit dhe motra më e madhe gjithmonë e porosisin të jetë e kujdesshme në timon. Por si gjithmonë Zaimina, në fund të fundit, e ka të vështirë të dalë nga vetja dhe vazhdon të jetë e pasionuar pas shpejtësisë.