Nis puna për rikonstruksionin e Rrugës së Elbasanit, në segmentin nga kryqëzimi me rrugën “3 Vëllezërit Kondi” deri te Akademia e Rendit (pranë Saukut). Kryebashkiaku Rama ka premtuar se ky segment do t’i shtohet së shpejti hartës së rrugëve të rehabilituara të kryeqytetit. Projekti për asfaltimin e këtij segmenti i ka kushtuar arkës së Bashkisë së Tiranës, 21 milionë lekë. Rruga e Elbasanit për momentin është e vetmja arterie që lidh qytetin e Tiranës me pjesën jugore të qarkut të Tiranës. Ajo është në të njëjtën kohë edhe e vetmja rrugë lidhëse e metropolit të Shqipërisë me qytetet e pjesës lindore të Shqipërisë si edhe me shtetet fqinjë të lindjes. Pëveç fluksit të zakonshëm të mjeteve që lëvizin drejt lindjes dhe anasjelltas, në Rrugën e Elbasanit shtohet edhe fluksi, edhe pse i përkohshëm, i mjeteve të banorëve të qytetit që u drejtohen lokaleve dhe qendrave të dëfrimit në këtë zonë. “Duke kompletuar shtrimin e këtij aksi deri në hyrje të qytetit, ne e çlirojmë përfundimisht këtë pjesë të Tiranës dhe njëkohësisht u ofrojmë qytetarëve shembullin e Tiranës së re që ngrihet përmes punës, përmes mundit dhe durimit të tyre, pasi pas çdo kantieri është një ambicie dhe është një rezultat që i kënaq të gjithë, ka thënë kryebashkiaku Rama, i cili ishte i pranishëm në nisjen e punimeve. Jemi këtu për të ridëshmuar një vazhdimësi pune të jashtëzakonshme, e cila në këtë aks përmbyllet me sukses të plotë dhe njëkohësisht ofron shembullin për të gjitha ato pjesë të tjera ku sot qytetarët duhet të bëjnë pak durim, pasi do të kenë mundësi të shohin se si do të jetë e nesërmja e afërt”.