Një takim special dhe një telefonatë më shumë. Këto dy çmime të premtuara nga Drejtoria e Përgjithshme e Burgjeve, kanë vënë në garë të paraburgosurit, të cilët morën pjesë në aktivitetet e ndryshme sportive që u zhvilluan në burgun 313-të në kryeqytet. Të ndarë në dy skuadra, Drini dhe Vjosa, që në orët e para të mëngjesit të djeshëm, të akuzuarit për krime të ndryshme, madje dhe të rënda, kanë nisur të stërviten për të qenë sa më 'vigjilentë' në lojë. Aktiviteti jo vetëm që ka ngjallur shpirtin e garës, por ka sjellë një atmosferë ndryshe në ambientin e vuajtjes së dënimit. Të veshur me kostume sportive, të privuarit nga liria janë vendosur në grupe të vogla dhe i kanë dhënë kurajë njëri-tjetrit. Me dorë në zemër, ata kanë dëgjuar himnin e flamurit që u vendos në hapje të spartakiadës dhe më pas shumë të vendosur u kanë shkuar deri në fund lojërave të ndryshme sportive.
Aktiviteti
Spartakiada sportive ka nisur me lojën e tërheqjes së litarit. Një arbitër ka qëndruar në gatishmëri, për të mos lejuar asnjë "hile" nga skuadrat e të paraburgosurve. Gara ka qenë e fortë. Të dy grupet ishin në lartësinë e duhur për t'u cilësuar fitues. Më pas, ata kanë zhvilluar një lojë volejbolli. Tifozeria nuk mungoi. Aktivitetin e përshëndeti dhe Drejtori i Përgjithshëm i Burgjeve, Saimir Shehri. Që në hapje të spartakiadës sportive, Shehri u shpreh se do të ndërmerrte hapat e nevojshëm për përmirësimin e jetesës në qeli. Numri një i Burgjeve ka qëndruar pranë të burgosurve deri në fund të aktivitetit. Në vazhdim të aktivitetit, të izoluarit në ambientet e paraburgimit janë argëtuar duke zhvilluar ndonjë lojë shah, apo tennis. Fituesit, që gjatë aktivitetit të djeshëm kanë qenë të shumtë, tashmë kanë të drejtën e një takimi special më shumë, si dhe të një telefonate shtesë. Ndërkohë, sot në Burgun e Rrogozhinës do të organizohet një tjetër aktivitet kulturor me pjesëmarrjen e grupeve të ndryshme folklorike dhe humoristëve të shumtë.
Te paraburgosurit
Shumë nga të paraburgosurit VIP, nuk janë bërë pjesë e lojërave sportive. Gëzim Salillari, i njohur ndryshe si "Gëzimi i Kashtës", mbi supet e të cilit rëndon akuza "e trafikut ndërkombëtar të lëndëve narkotike", qëndroi gjatë gjithë kohës i ulur në cepin e fushës së vogël të burgut 313-të. Megjithëse avokatët e tij kanë kërkuar lirimin e Salillarit, pasi tashmë Drejtësia italiane e ka thënë "fjalën" e saj, ai vazhdon të jetë i izoluar në qeli, ndaj dje nuk është angazuar në asnjërën prej lojërave, duke qëndruar tejet indiferent. Lavdërim Tufa, i dënuar për vrasjen e Fatmir Ramës (Mirit të Xhikes), me burgim përjetë, duket se i zhgënjyer nga drejtësia, nuk ka patur asnjë dëshirë të marrë pjesë në spartakiadë. Anëtarët e "Bandës së Lushnjës", Dritan Vila, i dënuar me burgim përjetë e Maksim Çela, me 25 vjet, duket se e kanë mendjen të vendimi që Gjykata e Apelit do të japë për ta, ndaj dhe kanë preferuar të qëndrojnë larg entuziazmit që solli spartakiada.