TIRANE - Një tjetër makinë i shtohet listës me më tepër se 40 automjete të grabitura nga dhjetë personat e akuzuar si anëtarë të bandës "Mercedes 2006". Burime zyrtare nga policia e Tiranës thanë se agjentët e Antikrimit Ekonomik kanë zbuluar së fundmi një tjetër makinë të vjedhur nga anëtarët e bandës. Rasti më i fundit është trajtuar nga komisariati nr.1 në kryeqytet, i cili ka sekuestruar mjetin "Benz Mercedes" me targa TR 8350 F, ngjyrë e bardhë në pronësi të një personi. Sipas burimeve të policisë, bllokimi dhe sekuestrimi i makinës është bërë sepse ky mjet është denoncuar si i vjedhur dy vite më parë, më 4 tetor 2004, nga pronari i vërtetë i mjetit. "Pas thellimit të hetimeve rezultoi se ky mjet është ritarguar me targë TR 8350 F nga shtetasi Adrian Poçi, i cili do të ndiqet për konsumim të veprës penale të "vjedhjes", e parashikuar në nenin 134 të Kodit Penal. Burimet e policisë së kryeqytetit janë shprehur se makina e bllokuar u zbulua në kuadër të hetimeve për dosjen penale "Mercedes 2006", në të cilën akuzohen nëntë persona.
Ata u arrestuan në fillim të muajit shtator 2006, pas një operacioni të gjerë të policisë në disa qytete. Ky grup personash është akuzuar nga policia për vjedhjen e më shumë se 40 makinave "Benz" në kryeqytet.