Ka mbetur vetëm në letër vendimi i marrë në korrik të këtij viti për rritjen e rrogave të punonjësve të policisë. Uniformat blu që prej muajit korrik nuk kanë marrë asnjë shtesë në pagë, pavarësisht se rritja mesatare ishte parashikuar mbi 14 për qind.

Në bankomate dhe sportelet e bankave, efektivave të policisë u thuhet se nuk ka mbërritur fondi për shtesën e rrogës. Sipas një përllogaritjeje të strukturave zyrtare, rezulton se për çdo muaj një efektiv policie duhej të kishte marrë rreth 5 mijë lekë të reja. Punonjësit e thjeshtë janë të paqartë për shkakun e vonesës në zbatimin e rritjes së pagave. Megjithatë ata kanë pyetur në bankat ku tërheqin paratë dhe u është thënë se fondi shtesë për rritjen e pagës nuk ishte xhiruar.

Rritja e pagës
Në muajin korrik të këtij viti, zyrtarët e policisë deklaruan se qeveria kishte miratuar projektin për rritjen e pagave të policisë. Rritja mesatare për punonjës ishte 14.6 për qind, ndërsa shtesa e rrogës është shpërndarë në strukturë sipas rëndësisë dhe vështirësisë së punës. Sipas vendimit të qeverisë, efekti financiar, pra rritja e rrogës për efektivat e policisë shtrihej që nga 1 korriku 2006. Por kanë kaluar katër muaj dhe në 15-ditëshin e parë të tetorit efektivat e policisë kanë marrë të njëjtën rrogë si para 1 korrikut. Mësohet se shuma e shtesës që u është ndaluar efektivave të policisë për katër muaj është rreth 5 mijë lekë të reja për punonjës. Megjithatë, atyre që kishin përfituar një rritje me të madhe u është mbajtur një vlerë më e lartë, pasi shtesa mbi rrogën ka qenë e tillë.

Policia
Pas konfirmimit të vonesës 4-mujore të shtesës së rrogës, gazeta kontaktoi me sektorin e Menaxhimit të Burimeve Njerëzore në Drejtorinë e Përgjithshme të Policisë. Zyrtarët e këtij institucioni thanë se vonesa në dhënien e rritjes së rrogës ka ndodhur vetëm për Drejtorinë e Policisë së Tiranës. Sipas burimeve zyrtare, në Drejtorinë e Policisë së kryeqytetit, për shkak të numrit të madh të punonjësve ka pasur probleme me fondin. Buxheti për rritjen e pagave të policëve nuk ka mbërritur në kohë dhe si pasojë efektivat e policisë në disa sektorë në kryeqytet vazhdojnë të marrin rrogën në vlerën e para katër muajve, pa rritjen e miratuar nga Këshilli i Ministrave. Burimet nga Drejtoria e Përgjithshme e Policisë janë shprehur dje se po punohet intensivisht për të zbatuar vendimin e qeverisë. “Çdo punonjës policie, të cilit i është vonuar shtesa e rrogës, do ta marrë atë. Kjo do të realizohet brenda një harku të shkurtër kohor, pasi vendimi i qeverisë krijon mundësinë për evokimin e buxhetit dhe fondeve të Drejtorisë së Policisë së Tiranës”, janë shprehur burimet nga Drejtoria e Përgjithshme. Ato sollën shembuj si drejtoritë e Shkodrës, Vlorës dhe Gjirokastrës, ku efektivat e policisë kanë marrë në kohë rritjen e pagës. “Për të gjithë ata efektiva të policisë do të jepet shtesa e prapambetur e pagës mujore, sipas vendimit të Këshillit të Ministrave, miratuar në korrik të këtij viti”, kanë siguruar burimet nga Drejtoria e Përgjithshme e Policisë së Shtetit.

Tatimi
“6 muaj pa orët e natës”

TIRANE – “Do të marrim paratë e prapambetura, por ato grumbullohen dhe rrogat tona tatohen. Kështu që do të na mbajnë më shumë nga rroga”. Kështu thonë policët kur mësojnë se do të marrin shtesën e prapambetur. Një tjetër problem me të cilin përballen efektivat e policisë është pagesa për orët e natës. Bëhet fjalë për natyrën e veçantë të shërbimit, orari i të cilit shpërblehet me një pagese më të lartë sesa për orarin e zakonshëm të punës. Orët e natës nuk paguhen bashkë me rrogën, por si zë i veçantë në fondin e rrogave. Për këtë shkak ka ndodhur që për gjashtë muaj efektivat e policisë nuk kanë marrë pagesën për orët e natës, ose siç quhet ndryshe, turni i tretë. Një kohë e tillë pune, që fillon pas orës 22:30 të mbrëmjes dhe mbyllet rreth orës 07:40 të mëngjesit, cilësohet edhe si orar shtesë në grafikun e shërbimit mujor të efektivave të policisë. Edhe vitin e kaluar efektivat e policisë kanë pasur probleme me pagën për orët e natës. Pagesa është bërë me 5 ose gjashtë muaj vonesë, duke krijuar kështu një “traditë” në rastin e fundit e si rrjedhim vonesë edhe në marrjen e pagës për orët shtesë nga efektivat e rendit. Probleme, sipas efektivave të policisë, ka pasur edhe me pagat për shërbime të veçanta, siç janë proceset zgjedhore apo masat për vizitat e personaliteteve.

• 2 mije
  është numri i përafërt i efektivave të policisë së kryeqytetit, të cilët ende nuk kanë marrë shtesën e pagës së miratuar në korrik 2006
  
• 5 mije
  lekë të reja është shuma financiare mesatare e prapambetur prej katër muajve, për çdo efektiv të policisë që shërben në kryeqytet
  
• 22 krime
  më shumë kanë ndodhur në tre muajt e fundit në territorin e Tiranës, krahasuar me periudhën korrik-shtator të vitit të kaluar