TIRANE - Policia Rrugore gjatë dhjetë ditëve të fundit ka vendosur 4806 masa administrative ndaj shoferëve dhe drejtuesve të automjeteve. Sektori i trafikut ka vendosur 2894 masa, ndërsa në linjat e rrugëve që dalin nga kryeqyteti janë ndëshkuar gjatë dhjetë ditëve të fundit 1192 drejtues makinash. Sipas policisë, vetëm dy shoferë u konstatua se kishin konsumuar alkool, ndërsa 67 të tjerë kanë tejkaluar shpejtësinë. Për parakalime të gabuara policia ka ndëshkuar 93 drejtues mjetesh dhe për mosmbajtje krahu janë marrë masa në 26 raste. Policia tha se problemi më i madh është mosnjohja e sinjalistikës rrugore, ku janë regjistruar 872 kundërvajtje, ndërsa gjatë kontrolleve janë gjetur dhe bllokuar më shumë se 46 mjete pa dokumentacion të rregullt. Një fenomen tjetër është mosmbajtja e rripit të sigurimit, ku policia ka ndëshkuar 346 drejtues automjetesh. Policia deklaroi se ka bllokuar edhe 34 mjete, për shkak të lëvizjes pa leje drejtimi, pa targa, me targa të huaja, të cilave u ka kaluar afati. Policia tha se për këto raste ka pezulluar përkohësisht 49 leje drejtimi. Gjatë kontrolleve dhe verifikimeve janë konstatuar raste kur shoferët kundërshtojnë efektivat e Policisë Rrugore në urdhrat që ata japin ndaj shoferëve. Policia tha se do të vazhdojë kontrollet me numër të shtuar efektivash.