TIRANE - Fillon operacioni i policisë për zbulimin e makinave të vjedhura dhe atyre që kanë hyrë kontrabandë në Shqipëri. Ditën e djeshme efektivat e Policisë Rrugore kanë filluar kontrollet e para të mjeteve që janë prodhim i viteve të fundit. Mjetet e dyshuara nuk janë vetëm ato me targa të huaja, por edhe ato që janë pajisur me targa shqiptare. Sipas burimeve policore, mësohet se ditën e djeshme janë ndaluar për verifikim disa drejtues mjetesh. Atyre u janë marrë të dhënat e makinave, dokumentet dhe elementë të tjera, të cilat po verifikohen nga organet e Policisë Rrugore. Mësohet se operacioni i policisë, i cili ka filluar në Tiranë, por do të shtrihet në të gjithë vendin, erdhi pas disa informacioneve operative. Këto të dhëna bënin fjalë për një numër të konsiderueshëm automjetesh, prodhime të viteve të fundit që kanë hyrë në Shqipëri vitet dhe muajt e fundit. Ato dyshohet se janë të vjedhura jashtë Shqipërisë dhe kanë hyrë në vendin tonë nëpërmjet shmangies në doganë dhe modifikimit të shasive dhe të dhënave të tjera. Policia ka rënë në gjurmët e disa serviseve që realizojnë veprime të tilla dhe menjëherë ka filluar hetimet. Burimet e policisë thanë se gjatë operacionit do të verifikohen disa kategori mjetesh të dyshuara, do të merren në pyetje drejtuesit e tyre dhe bazuar në këto informacione do të krijohet një bazë krahasimi. Kjo bazë të dhënash do të krahasohet me të dhënat ndërkombëtare të policisë për mjetet e vjedhura në disa prej vendeve nga ku dyshohet se makinat trafikohen në Shqipëri. Nëse të dhënat e mjeteve që lëvizin në vendin tonë përputhen me elementë identifikues të mjeteve të denoncuara si të vjedhura jashtë, atëherë policia do të veprojë me bllokimin e menjëhershëm të mjetit dhe ndjekjen penale të drejtuesit. Gjatë operacionit të filluar dje nga policia, mësohet se organet e rendit kanë kërkuar bashkëpunim edhe me organet e doganave. Prej tyre pritet të merren informacione të vlefshme për zbulimin e makinave që dyshohet se janë të vjedhura jashtë Shqipërisë dhe që më pas kanë hyrë në vendin tonë, pasi janë blerë për çmime të lira. Në aksion marrin pjesë efektivat e Policisë Rrugore të mbështetur edhe nga autopatrullat "Shqiponja" dhe sektorë të tjerë të Policisë së Shtetit. Pas Tiranës policia tha se operacioni do të shtrihet edhe në disa qytete të tjera të Shqipërisë