Të gjithë në kërkim të talentit!

Burimi njerëzor është “mbreti” i së ardhmes



 

Nuk ka një vlerë tregu, nuk mund të kuotohet në bursë dhe nuk është i lehtë për t’u gjetur: megjithatë konsiderohet produkti më i shtrenjti i planetit. Bëhet fjalë për talentin, ose më saktë për “forcën e trurit”, të kapacitetit intelektual, që sipas gjykimit të ekonomistëve dhe analistëve financiarë, është e destinuar të përcaktojë ndryshimet në një botë të globalizuar. Do të kushtojë, duke e krahasuar me shumë të tjera, më shumë se burimet energjitike, më shumë se industria e prodhimit me dorë, më shumë se zhvillimi teknologjik; dhe për ta patur, duke ia “zhvatur” ndërmarrjeve apo vendeve të tjera, do të ketë një luftë të rëndësisë së veçantë. Uinston Çërçill e parashikonte këtë që para 60 viteve: “Perandoritë e së ardhmes do të jenë perandoritë e mendjes”. Sot, është e qartë se për të qenë ndër të parët në fushën e teknologjisë, financës, biznesit, administratës publike, duhet të intensifikosh “gjuetinë ndaj talentit”. “The Economist”, bibla e liberalizmit kapitalist, kërkon më shumë vëmendje për këtë fenomen me një studim prej 20 faqesh në numrin e saj të fundit, duke sinjalizuar që, përkrah betejave të vjetra për burimet “natyrore” po intensifikohet edhe beteja për burimet “njerëzore”. Plakja e popullsisë në vendet e industrializuar, të lindurit gjatë viteve të bumit të parë ekonomik pas Luftës së Dytë Botërore, tregojnë se brenda pesë viteve të ardhshme kompanitë dhe admninistratat publike do të humbasin një numër të madh drejtuesish me eksperiencë. T’i zëvendësosh ata do të jetë shumë e vështirë: sipas një sondazhi të “Corporate Executive Board”, institut kërkimor amerikan, bëhet e ditur se për të “tërhequr dhe mbajtur talente” është prioriteti kryesor i kompanive, që cilësia e kandidatëve ka rënë 10 për qind krahasuar me vitin 2004, që ditët e nevojshme për të zëvendësuar një manaxher janë rritur nga 37 në 51 në të njëjtën periudhë, që një drejtues në tre merr oferta për t’u transferuar në një kompani tjetër. Atëherë çfarë duhet bërë? Si fillim, përgjigjen ekspertët e pyetur nga e përjavshmja britanike, duhet të merret parasysh që “gjuetia e talentit” është një kërkesë globale: gjysma e fituesve amerikanë të çmimit Nobel për Fizikë në shtatë vitet e fundit, janë emigrantë, ashtu si edhe gjysma e personave që kanë mbrojtur një doktoraturë universitare, të cilët jetojnë në Shtetet e Bashkuara; dhe një e treta e shoqërive të teknologjisë në Silicon Valley janë të themeluara nga kinezë ose indianë. Shembuj të tjerë të globalizimit të trurit: Gjermania është lidere në fushën e inxhinierisë, Italia në arkitekturë, Finlanda në komunikim. Së dyti, duhen ndjekur disa rregulla bazë. Të lehtësohen ligjet mbi emigrimin, duke inkurajuar më të të kualifikuarit, të ofrohen paga të kënaqshme, të shumëfishohen investimet në “kërkime dhe zhvillim”, të krijohen universitete elite dhe t’i kushtohet vëmendje revolucionit teknologjik që u mundëson njerëzve të zakonshëm të qarkullojnë idetë. Dikush e quan pikën e fundit si “hakmarrja e Karl Marksit”: në fakt, mjetet proverbialë të prodhimit, në formën e kompjuterit, tani ndodhen në duart e punëtorëve. Talenti që duhet thithur dhe ruajtur, nënvizon “The Economist”, nuk është vetëm individual: ekziston edhe talenti kolektiv, që mund të kuptohet me forcën e tërë punëtore të një ndërmarrjeje ose të një kombi.

• 75 perqind
  Për 75 për qind të menaxherëve amerikanë, tërheqja e personelit të talentuar është prioritet kryesor
  
• 51 ditë
  Koha për të zëvendësuar një menaxher të aftë është rritur në 51 ditë nga 37 që ka qenë dhjetë vjet më parë
  
• 1në3 Propozime
  Një në tre punonjës merr oferta nga kompanitë e tjera për të ndryshuar punën

 

Rregullat

T’i japësh përvojës dhe talentit të njëjtën rëndësi
Të kryesh kontrolle të brendshme lidhur me kodin e etikës
Të kesh parasysh se talenti mund të zbulohet me vonesë e në mënyrë të pazakontë

 

Sektorët e rëndësishëm

Industria e teknologjisë së lartë
Bankat e financa
Shoqëritë e konsulencës