BERZH jep 115 milionë lekë. Punimet përfundojnë pas 12 muajsh     

Nisin punimet për rehabilitimin e pjesës së dytë të Unazës së Tiranës, të cilat do të zgjasin plot një vit. Punimet që kanë nisur gjatë ditës së djeshme në segmentin e parë të Unazës, nga "Zogu i Zi" deri te Stacioni i Trenit, do të ndiqen në ditët që vijnë nga nisja e punimeve edhe në dy segmentet e tjera, të cilat do të bëjnë lidhjen organike të pjesës së rikonstruktuar të Unazës së kryeqytetit. Projekti që i ka kushtuar arkës së Bashkisë së Tiranës 115 milionë lekë, është mundësuar falë huasë së BERZH-it.
Projekti
Kjo pjesë e Unazës së Tiranës, ka kohë që është kthyer në një ndër akset më të amortizuara dhe më problematike si për lëvizjen e automjeteve ashtu edhe për këmbësorët. Nisja e punimeve gjatë ditës së djeshme në këtë segment, është konsideruar e një rëndësie të veçantë edhe për faktin se do të bëjë lidhjen organike me pjesën tjetër të Unazës së rikonstruktuar. Në këtë pjesë, punimet do të jenë të ndara në tre segmente. Segmenti i parë nis nga Zogu i Zi - Stacioni i Trenit dhe ka një gjatësi prej 0.9 km. Do të jetë me dy kalime vajtje-ardhje, me nga dy korsi kalimi për secilin drejtim 3.5 m gjerësi secila, me një zonë të gjelbëruar 1.5 m dhe me zona parkimi me nga 2.5 m në të dyja anët e rrugës. Projekti parashikon edhe rikonstruksionin e plotë të të gjithë rrjetit inxhinierik. Gjithashtu është parashikuar edhe studimi i plotë i trafikut në këtë rrugë, duke përfshirë këtu sinjalistikën rrugore vertikale dhe horizontale; semaforët në të gjitha kryqëzimet, të cilat do të rregullojnë trafikun e mjeteve dhe të këmbësorëve në këto nyje.
Kredia
Projekti i Unazës së Re i ka kushtuar Bashkisë së Tiranës 115 milionë lekë, dhe kjo është bërë e mundur falë huasë së Bankës Evropiane për Rindërtim dhe Zhvillim (BERZH), për projektin e zhvillimit të rrugëve bashkiake të Tiranës. Kryebashkiaku Rama, i pranishëm në nisjen e punimeve, ka thënë se së shpejti do të nisin punimet edhe në dy segmentet e tjera të kësaj unaze, por pa e zhvendosur vëmendjen e bashkisë nga infrastrukturat e vogla të kryeqytetit. "Sot ne hapim kantierin e segmentit të parë, i cili do të lidhë praktikisht të gjithë pjesën e rindërtuar dhe do të qëndrojë në kufi me Stacionin e Trenit, aty ku do të fillojë pas pak ditësh segmenti i dytë, e pastaj i treti, për t'u lidhur me Brrylin dhe për të krijuar profilin përfundimtar të Unazës, - është shprehur kryetari i Bashkisë, Edi Rama. - Jemi po kaq të fokusuar edhe në infrastrukturat e vogla të komuniteteve për të ndërtuar kryeqytetin evropian, jo vetëm në akset e mëdha, por edhe në çdo lagje dhe bllok banimi", - ka përfunduar ai.