Kryetarja e Agjencisë së Kthimit dhe Kompensimit të pronave, Justina Boriçi thotë se fondi prej 3 milionë USD nuk do të digjet, por do u shpërndahet pronarëve këtë vit. Në një prononcim për “Gazeta Shqiptare”, Boriçi siguroi se brenda muajit dhjetor pronarët do të përfitojnë nga kompensimi financiar i përcaktuar në buxhetin e shtetit dhe se këtë herë “fituesit” nuk do të përzgjidhen me short. “Është e sigurt që me short nuk do të përzgjedhim se cili pronar do të marrë lekë në formë kompensimi për tokën e zënë. Do të bëhet sipas radhës, ai që ka bërë kërkesën i pari për kompensim dhe ka më shumë kohë që pret, atij do i jepet kompensimi”, - tha Boriçi. Kryetarja e cilësoi hedhjen e shortit një procedurë të gabuar, duke deklaruar se këtë vit përzgjedhja do të bëhet sipas radhës. Edhe për këtë vit të favorizuarit do të jenë sërish pronarët e Tiranës, pasi për kryeqytetin është bërë harta e vlerës së tokës në bazë të së cilës mund të realizohet kompensimi. Por nuk përjashtohet mundësia që nga fondi i buxhetit të shtetit për kompensim të përfitojnë edhe pronarët e qytetit të Kavajës, pasi edhe për këtë qytet është duke u përfunduar përpilimi i hartës së vlerës së tokës. “Paratë do u jepen pronarëve. Nuk do të digjet fondi, pasi kompensimi do të bëhet brenda muajit dhjetor”, - premtoi kryetarja Boriçi. Ndërkohë që ministri i Drejtësisë, Aldo Bumçi tha dy ditë më parë se kompensimi nis në fund të qershorit 2007, kur të përfundojë harta e vlerës së tokës në shkallë republike, duke mos përmendur se ku do të shkojë fondi prej 3 milionë $ i përcaktuar për kompensim këtë vit.
Vendimet
Kryetarja Boriçi tha se do të rishikohen ato vendime të Komitetit të Kthimit dhe Kompensimit të Pronave, për të cilat ka ankesa dhe kontestime. Ndërkohë që nuk qartësoi se si do të procedohet në rastet kur verifikohen pasaktësi. Një ditë pas konferencës për pronën, ku u diskutua edhe dhënia e vendimeve mbi ato të “padrejta” që ka marrë komiteti, Boriçi tha se i mbetet përmirësimit të ligjit me amendamente të tjera që do të përcaktojnë mënyrën si do të veprohet më pas. “Nëse ka ankesa e kontestime për dosje të caktuara, do të kemi amendamente prapavepruese”, - sqaroi Boriçi, duke theksuar se Agjencia momentalisht është duke bërë vlerësimin e situatës. Sipas kryetares nuk ka ende një informacion të plotë, pasi po bëhet transportimi i materialeve nga ish-komiteti në Agjenci. Boriçi theksoi se Agjencia po merret me përfundimin e hartës së vlerës së tokës në Tiranë e Kavajë dhe më pas për të gjithë republikën. Ajo theksoi gjithashtu se paralelisht po ecën edhe procesi i njohjes së pronave që do të vihen në dispozicion për kompensimin e pronarëve.