Të gjithë flasin për Ronaldinjon në shtëpinë e Milanit. Braziliani ka hyrë në "modë" te kuqezinjtë. Presidenti Berluskoni ka ftuar për darkë menaxherin (dhe vëllain) e fenomenit të Barçës. Kaka i ka dërguar mesazhe të sakta, ndërsa tani edhe holandezi Sedorf i dërgon një "përkëdhelje", madje shumë realiste: "Nuk besoj se ardhja e tij është një hipotezë e lodhshme për momentin, sepse deri në dhjetor merkatoja është e mbyllur. Të shohim gjithsesi, nëse vitin e ardhshëm, presidenti ynë dhe ai i Barcelonës, do të gjejnë një marrëveshje. Nëse Ronaldinjoja do të dojë të vijë, do të jemi të gjithë të lumtur. Do të isha i gatshëm t'i jepja edhe fanellën me numër 10-të". Pavarësisht nga çështjet e merkatës, Milani është i përqendruar te kampionati. Pasi ka kaluar ciklin e parë të ndeshjeve, skuadra e Ançelotit është gati të rifillojë fitoret, por më parë duhet kaluar shterpësia e golave nga sulmuesit: "Nuk jemi të shqetësuar për tri barazimet rradhazi 0-0, sepse të paktën në dy raste, kemi merituar të fitojmë. Ka ende diçka për të përmirësuar, por kundër Lilës e Sienës luajtëm mirë", - përfundon Sedorfi.