Greqi, ligj i ri për emigrantët

GREQI

Të gjithë ata që emigrantë shqiptarë që do të rinovojnë dokumentet, apo të tjerë që janë aktualisht ilegal apo me leje të përkohshme qëndrimi, nuk do të presin më me ditë edhe javë të tëra nëpër sportelet e zyrave greke. Ministri i Brendshëm grek për pushtetin lokal, Prokopis Pavlopulos, ia ka paraqitur projektligjin e ri një komisioni të posaçëm qeveritar, i cili shumë shpejt pritet ta miratojë. Projektligji i ri synon të bëjë ndryshime rrënjësore, në mënyrë që të përballoheshin një sërë problemesh të lindura nga ligji aktual “Për integrimin e emigrantëve”, me numër 2910/2001, i cili krijoi edhe një frymë burokracie dhe radhë të gjata emigrantësh, ku ata humbnin ditë të tëra pune. Projektligji i ri bën fjalë për zbatimin e udhëzimeve të BE-së, për bashkimin familjar, statusin për lejen afatgjatë, dhënien e lejeve për viktimat e trafikimit njerëzor e shumë probleme të tjera të emigrantëve. Ndërsa afati për dorëzimin e dokumenteve, është 31 dhjetori i këtij viti.
Sipas projektligjit në fjalë, në komisionin dyministror të Ndjekjes së Politikës së Emigracionit, tashmë do të marrin pjesë edhe ministrat e Zhvillimit, të Arsimit dhe të Besimit Fetar, Shëndetësisë dhe Asistencës Sociale, Bujqësisë dhe Kulturës, për të përcaktuar akoma më qartë rrugët që do të ndjekë politika e re e emigrimit për një integrim sa më efikas të emigrantëve në shoqërinë greke. “Koha që i duhet një emigranti që të bëjë kërkesën për rinovimin e lejes së qëndrimit, do të jetë dy muaj nga dita e skadimit të lejes ekzistuese. Në raste tepër të veçanta kur arsyet janë  ”madhore”, atëherë ky afat mund të jetë deri në një muaj para datës së skadimit. Në rast se nuk ka arsye justifikimi dhe emigranti vonohet të dorëzoje kërkesën, do të ketë edhe gjobë e cila shkon deri tek 1/3 e vlerës së një gjobe shtëpiake”, - thuhet në projektligjin e ri grek. Po ashtu, për emigrantët shqiptarë krijohen ndryshime legjislative për mundësimin e blerjes së ditëve te sigurimit shoqëror (ensimave) deri në 20 për qind të numrit që tashmë kërkohet, për arsye se një prej problemeve më të mëdha për rinovimin e lejeve, ishte pamundësia për plotësimin e këtij numri nga të interesuarit, për arsye të punësimit të tyre sezonal në periudha të shkëputura kohore. Nëse projektligji bëhet ligj, atëherë anulohet provimi i detyrueshëm ndaj personave që kanë aplikuar për lejen e qëndrimit afatgjatë, për njohjen e mjaftueshme të gjuhës greke dhe elementëve nga historia dhe kultura greke, si dhe hiqet detyrimi për pagesën e detyruar (paravolo) të të gjithë të miturve. “Gjithashtu, lejohet përpilimi i veprimeve noteriale nga shtetas të vendeve jashtë BE-së, përderisa emigranti ka dorëzuar të gjitha dokumentet për dhënien e lejes së qëndrimit dhe zotëron vërtetimin përkatës, ndërsa me ligjin ekzistues duhej patjetër leja e vjetër e qëndrimit. Po ashtu, zgjidhet problemi për ata që nuk kanë nxjerrë akoma pasaporta, përderisa janë akoma në procesin e pritjes se marrjes së saj. Për ekzistencën e kësaj pamundësie merr vendim një komision i posaçëm i ministrisë, pas një vërtetimi të zyrës së posaçme të Ministrisë së Jashtme, - thuhet në projektligj, sipas të cilit, “rriten dënimet dhe gjobat për ata që favorizojnë hyrjen e emigrantëve të paligjshëm në vend”. Edhe një favor tjetër ka të bëjë me aplikimin për leje qëndrimi të atyre emigrantëve, të cilët kanë qëndruar në Greqi deri në datën 31.12.2004, duke pasur si bazë dokumente të cilat vërtetojnë këtë qëndrim.

NDRYSHIMET

Koha që i duhet një emigranti të bëjë kërkesën për rinovimin e lejes së qëndrimit, do të jetë dy muaj nga dita e skadimit të lejes ekzistuese.
Emigrantët mund të blejnë ditët e sigurimit (ensimave) deri në 20 për qind të numrit që kërkohet, për rinovimin e lejeve.
Rregullohet çështja e emigrantëve të cilët janë pranuar në Greqi, sipas ligjit për bashkimin familjar dhe në vazhdim morën leje qëndrimi si të punësuar.
Anulohet provimi i detyrueshëm ndaj personave që kanë aplikuar për lejen e qëndrimit afatgjatë për njohjen e mjaftueshme të greqishtes, historisë dhe kulturës greke.
Rriten dënimet ligjore dhe gjobat për ata që lehtësojnë hyrjen e emigrantëve të paligjshëm në vend.
U jepet më shumë mundësi për të aplikuar për leje qëndrimi një kategorie të veçantë emigrantesh, të cilët kanë qëndruar në Greqi deri në datën 31.12.2004, duke pasur si bazë dokumente të cilat vërtetojnë këtë qëndrim.
Për dorëzimin e dokumenteve nga emigrantët, përcaktohet si afati i fundit data 31.12.2006.